DILI, 22 Outubru 2025 (TATOLI)—Komisaun organizadora primeira divizaun Liga Futeból Femininu Timor-Leste (LFFTL) husu klube primeira divizaun atu kumpri regulamentu jogu durante partisipa kompetisaun époka 2025-2026.
Koordenadór Komisaun Organizadora LFFTL, Janio Tilman esplika regulamentu ne’ebé estabelese maihusi desizaun koletiva iha-ne’ebé klube sira aseita no kompromete kumpri nune’e bele garante kualidade kompetisaun inklui hatuur valór profisionalizmu.
“Ita deside liuhusi enkontru tékniku ne’ebé fó-sai regra jerál no espesífiku atu klube sira tenke kumpri durante realiza kompetisaun,” Janio Tilman hateten iha ninia kna’ar fatin, Bairros dos Grilos, Kuarta ne’e.
Notísia relevante: Klube kampionatu LFFTL sei hetan prémiu rihun $15
Tilman relata regra jerál sira-ne’ebé tenke kumpri mak kona-ba prosesu administrasaun hanesan estatuta, konta bankária no lista jogadór husi kada klube, seluk mak obrigadu treinadór klube sira tenke iha sertifikadu mínimu lisensa C.
Aleinde ne’e, husu klube sira mantein lista jogadór ne’ebé submete ona ba komisaun no bandu iha jogadór foun bainhira janela transferénsia seidauk loke husi komisaun LFFTL.
“Inportante klube sira kontinua halo preparasaun másima liután hodi garante kualidade jogu,” Tilman hameno.
Entretantu, primeira divizaun LFFTL rasik hahú ona kompetisaun iha loron 18 Outubru iha-ne’ebé kompete husi klube sanulu kompostu Buibere FC, AD-SLB, S’amuser FC, Maranatha FC, FC Kulugisa, Akadémika FC, UNITAL FC, Maudoko FC, VDL FC no Na’in-Feto FC.
Jornalista: Natalino Belo
Editór: Xisto Freitas da Piedade
