Klube kampionatu LFFTL sei hetan prémiu rihun $15

DILI, 22 Outubru 2025 (TATOLI)—Klube futeból ne’ebé kampiaun iha kompetisaun primeira divizaun Liga Futeból Femininu Timor-Leste (LFFTL) sei hetan prémiu orsamentu ho montante hamutuk rihun $15.

Koordenadór Komisaun Organizadora LFFTL, Janio Tilman, esplika desizaun referida parte Komisaun fó-sai no hetan ona konkordánsia husi partisipante klube hamutuk sanulu ne’ebé atuál kompete iha primeira divizaun LFFTL époka tinan 2025-2026.

“Prémiu mak rihun $15 maibé ida-ne’e jogu full kompetisaun. Ami espera jogadór sira bele aguenta to’o kompetisaun ramata,” Koordenadór Komisaun Organizadora LFFTL hateten iha ninia kna’ar fatin, Bairros dos Grilos, Kuarta ne’e.

Tilman dehan komisaun organizadora sei prepara mós tasa no medalla ba ekipa primeiru lugár iha-ne’ebé totál orsamentu ne’ebé aloka ba kompetisaun futeból feto iha Timor-Leste hamutuk hotu rihun $200.

Aleinde ne’e, klube ne’ebé partisipa sira sei hetan bonus $600 ne’ebé fahé ba kategoria tuir persentajen hanesan manán sei hetan pursentu 70, impata 50, lakon pursentu 30 no klube ida sei hetan subsídiu hamutuk $7.350 kompostu rihun $7 sei aloka fazeadamente tuir kalendáriu jogu, enkuantu $350 aloka ona tanba utiliza ba preparasaun antes hahú kompetisaun.

“Ida-ne’e ita halo diskusaun detallu no klube sira asina konkordánsia referida,” Tilman informa.

Entretantu, primeira divizaun LFFTL partsipa husi klube sanulu kompostu husi Buibere FC, AD-SLB, S’amuser FC, Maranatha FC, FC Kulugisa, Akadémika FC, UNITAL FC, Maudoko FC, VDL FC no Na’in-Feto FC.

Jornalista: Natalino Belo 

Editór: Xisto Freitas da Piedade