Ema deskoñesidu nauk sasán EBF 75 Lakluta

VIKEKE, 28 Outubru 2025 (TATOLI)–Xefe Suku Uma-Tolu, Postu administrativu Lakluta, Munisípiu Vikeke, Eduardo Soares informa ema deskoñesidu nauk ekipamentu pratika arte muzikál no suratahan (HVS) rim ida husi Ensinu Báziku Filiál (EBF) 75, iha Suku Uma-Tolu.

“Akontesimentu ne’e akontese iha Domingu (26/10) kalan ne’e, eletrisidade mate ne’ebé ema dezkoñesidu sobu tiha vintilasaun edifísiu EBF 75 Uma-Tolu mak tama bá laran hodi nauk biola ida no HVS rim ida. Fatin kloot ne’ebé sira labele foti speaker boot inklui sasán sira seluk,” Eduardo Soares ba TATOLI iha Postu Lakluta, Tersa ne’e.

Nia haktuir sasán sira-ne’e eskola nian no estudante sira uza hodi halo pratika muzikál, la’ós ema privadu nia sasán.

“Tan ne’e, ha’u hamutuk ho parte seguransa kontinua buka sasán eskola nian ne’ebé ema naik. Tuir ami-nia suspeita ne’e la’ós ema seluk mak halo, más joven balun mak hanoin aat hodi foti sasán sira-ne’e”, nia hato’o.

Nia dehan, akontesimentu ema nauk sasán eskola nian akontese iha tinan 2024, iha-ne’ebé ema nauk Ensinu Pré-Eskolár (EPE) nia speaker (koluna) to’o la hetan.

Iha fatin hanesan, Koordenadór EBF 75 Uma-Tolu, Afonso Soares sente triste ema deskoñesidu nauk sasán eskola nian ne’ebé estudante sira uza pratika kanta, agora ema nauk tiha estudante sira labele pratika tanba biola laiha.

“Ha’u informa ona ba autoridade no polísia hodi buka tuir autor sira-ne’ebé nauk eskola nia sasán,” nia hato’o.

Jornalista: Vitorino Lopes da Costa

Editór : Xisto Freitas da Piedade