KOVALIMA, 28 Outubru 2025 ( TATOLI) –Autoridade Munisípiu Kovalima liuhusi Servisu Munisípiu Administrasaun Rekursu Umanu rejista funsionáriu públiku na’in-127 tama iha lista idade reforma obrigatóriu iha tinan oin.
“Funsionáriu Públiku iha munisípiu Kovalima ne’ebé presta sira-nia servisu hamutuk 314 husi númeru ne’e, ita-nia funsionáriu ne’ebé maka tama iha lista idade reforma obrigatóriu na’in-127”, José Manuel Gonçalves, informa ba TATOLI, iha AMC.
Dirijente ne’e dehan, Funsionáriu públiku (FP) tama iha lista reforma obrigatóriu tuir lista ne’ebé simu husi Komisaun Funsaun Públiku ho kategória funsionáriu rejime jerál no rejime espesiál.
Ho lista funsionáriu Públiku idade reforma ne’e ,funsionáriu ne’ebé maka presta sira-nia servisu iha servisu munisipál 19 no funsionáriu sira ne’ebé maka koloka iha postu administrativu sira maka hanesan postu Administrativu Fatululik, Fatumea, Fohorem,Tilomar, Maucatar , Suai no Zumalai .
Tanba ne’e, Administrasaun rekursu umanu partilla ona informasaun no husu funsionáriu publiku sira ne’e tama idade reforma atu submete sira-nia dokumentu, nune’e rekursu munisípiu kontinua submete ba KFP atu prosesu sira-nia dokumentu.
Maske funsionáriu tama iha lista idade reforma maibé tinan oin autoridade Kovalima laiha planu atu hala’o rekrutamentu tanba kestaun orsamentu la sufisente. Molok ne’e iha 2024 halo ona rekrutamentu ba funsionál na’in-40 resin hodi reforsa servisu iha Administrasaun Munisípiu Kovalima.
Jornalista:Celestina Teles
Editór:Florencio Miranda Ximenes
