VIKEKE, 28 Outubru 2025 (TATOLI)–Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo informa progresu konstrusaun sistema bee-moos ba Uatukarbau daudaun ne’e empreza kontinua servisu no agora iha progresu.
“Daudaun ne’e empreza responsavel kontinua hamoos kanu distribuisaun nian, kanu balu komesa instalada ona, tanke PBT cor hotu ona. Hela tanke rezervatóriu husi bee-matan nian mak seidauk,” José Baptista do Carmo ba TATOLI iha Uatukarbau, Tersa ne’e.
Autoridade ne’e hatutan autoridade sira sempre akompaña sistema melloramentu iha Uatukarbau. Progresu ne’ebé iha katak instalasaun kanu distribuisaun to’o ona iha área Baulale zona rua.
“Nune’e, ami haree traballadór husi empreza responsavel kontinua servisu kanalizasaun kanu ba komunidadé ba suku Uaniuma nian. Ba ami nia suku mak seidauk. Bainhira kanalizasaun ba Uaniuma nian hotu, sei kontinua ba ami-nia suku,” nia haktuir.
Obra referida, tuir nia, to’o fulan-Dezembru seidauk konkluidu tanba tanke husi bee-matan seidauk konstruidu.
“Kona-ba dalan liga bá bee-matan daudaun ne’e kondisaun di’ak. Tempu udan mak difikulta servisu, ne’ebé ita-nia empreza kontinua esforsu ba obra referida,” José akresenta.
Kona-ba traballadór, nia informa, kada tanke iha trabaadór na’in-haat inklui forsa traballu ema na’in-tolu mak halo servisu.
Entretantu, kustu projetu sistema bee-moos totál hamutuk $1.334,472.12, ne’ebé konstrui husi empreza Helfia Unip. Lda, durasaun servisu tinan ida.
Projetu referidu benefîsia uma-kain 985, totál populasaun 15.910 no sei distribui ba instituisaun sira hanesan postu saude, eskola, merkadu no igreja. Obra ne’e hahú lansa iha tinan 2024, obra fízika atualmente atinje 50%.
Jornalista: Vitorino Lopes da Costa
Editór: Xisto Freitas da Piedade
