BOBONARU, 29 Outubru 2025 (TATOLI)-Administradór Postu Administrativu (APA) Bobonaru, munisípiu Bobonaru, Tomás Barreto Henriques, husu ba komunidade, liuliu joven sira iha suku 18 atu selebra loron finadu iha ambiente pás no domin.
“Finadu hahú 01 to’o 02, ne’e nu’udar kostume Timór nian neʼebé hanesan loron importante ba família sira atu omenajen ba matebian sira-neʼebé husik ona mundu. Tanba ne’e, husu komunidade atu selebra iha idaidak nia knua ho ambiente pás, domin no armonia”, Tomás Barreto informa ba Tatoli, ohin.
Administradór ne’e mós husu ba komunidade atu kumpre lei no regra tránzitu sira hodi evita asidente durante selebra finadu.
Relasiona ho selebrasaun loron ne’e, administradór Bobonaro mós realiza enkontru ho komandante eskuadra Bobonaro no xefe suku 18 hodi ko’alia kona-ba seguransa durante finadu no prepara ba loron Natál 2025 no Tinan Foun 2026.
Rezultadu enkontru ne’e hasai regra hodi bandu komunidade iha posto Bobonaru konsumu tua iha estrada públiku no semitériu.
Iha loron 31 to’o 04 Novembru bandu vizitante sira ba Bee-Manas Marobo, aleinde ne’e sei hato’o pedidu ba Komando PNTL Munisípiu Bobonaru atu destaka membru iha fatin balu.
Ikus liu mak husu ba suku, postu no munisípiu, ne’ebé vizuñu ho postu Bobonaru atu respeita regulamentu referidu.
Notísia relevante: PNTL Bobonaro, BOP no F-FDTL sei asegura selebrasaun loron finadu
Jornalista: Sergio da Cruz
Editora: Maria Auxiliadora
