KOVALIMA, 29 Outubru 2025 ( TATOLI) – Komunidade iha Kovalima hahú hamoos ona semitériu hodi prepara ba selebra loron matebian ka finadu iha loron 02 novembru mai ne’e.
Komunidade Kovalima, João Amaral, hateten tinan-tinan atu tama ba loron boot finadu sempre hamoos ona rate hodi bele to’o nia loron lori lilin ho ai-funan mai sunu no kari tuir Timor-oan nia fiar no nia tradisaun.
“Finadu ne’e importante ba ita atu hatudu ita nia domin ba ita nia matebian sira, liu hosi ai-funan ho lilin ne’ebé ita sei mai kari no sunu iha matebian sira nia loron mak 02 Novembru,” Sidadaun João Amaral informa ba TATOLI, iha Kovalima.
Iha fatin ketak, Xefe Suku Lour, Postu Zumalai, Martino Julio Barreto Alves dehan, Atu selebra loron boot finadu sidadaun sira hotu husi Dili hala’o viajen mai iha ida-idak nia munisípiu.
“ Ita hatene iha selebrasaun loron finadu estudante no universitáriu ne’ebé iha Dili fila hotu mai iha ida-idak nia munisípiu atu komemora loron referidu”, nia informa.
Lidér lokál suku Lour fó ona orientasaun ba nia xefe aldeia sira atu partilla informasaun bainhira iha loron finadu hotu-hotu hakmatek bainhira ba hamoos rate labele provoka malu.
“Ha’u orienta ona ha’u konsellu suku sira atu kontinua habelar informasaun iha ambitu atu komemora loron boot finadu ho hakmatek iha ida-idak nia aldeia”, nia sujere.
Notisia relevante:Governu fó toleránsia pontu iha 31 Outubru ba selebrasaun loron matebian sira-nian
Jornalista:Celestina Teles
Editór:Florencio Miranda Ximenes
