BOBONARU, 29 Outubru 2025 (TATOLI)-Komunidade husu ba Governu atu toma atensaun ba reabilitasaun sitíu turístiku Bee-Manas Marobo, iha munisípiu Bobonaru, hodi atrai turista lokál no estranjeiru.
Rekomendasaun ne’e hato’o husi populasaun sira, tanba haree ba infraestrutura bázika iha Bee-Manas Marobo kuaze la funsiona no aat ka ferrujen hotu ona.
Abitante Marobo, Luciano de Jesus Afonso, hateten bainhira reabilita tiha sitíu turístiku ne’e iha posibilidade kontribui reseita ba Estadu, tanba Timor-Leste ona sai ona membru ASEAN no ema sei vizita fatin ne’e.
Notísia relevante: Tempu Badak MTKI Sei Simu Termu Entrega Husi SEFOPE Hodi Jere Bee Manas Marobo
“Turista husi país membru ASEAN barak mak sei mai, tanba investimentu barak sei loke iha Timor-Leste. Entaun, ema husi rai-li’ur mai barak, malae sira ne’e hakarak vizita fatin sira hanesan ne’e. Tanba ne’e mak ami husu ba ita-nia Governu atu tau-matan, hadi’ak ona para ba oin ne’e ita bele iha ona reseita”, nia sujere.
Aleinde ne’e, rezidente Marobo Deolindo da Costa reforsa katak Governu tenke rezolve duni infraestrutura ne’e tanba Bee-Manas Marobo nu’udar ikóniku munisípiu Bobonaru nian.
Nia lamenta katak daudaun ne’e vizitante lokál mós ladún paseiu ona bá fatin ne’e, tanba kondisaun estrada la di’ak.
“Uluk ne’e sábadu no domingu maski sasán barak mak aat mós ema sei mai hariis, más agora ladún mai, liuliu tempu udan tanba estrada barak mak nakfera, karreta agora atu tun bá liu bee-manas la di’ak, motór de’it mós susar dalaruma dudu de’it”, nia afirma.
Maski infaestrutura barak mak hetan estragu, maibé komundade sira ho voluntariamente organiza malu halo limpeza iha fatin Bee-Manas, liuliu pixina, sintina no fatin troka nia.
“Dalaruma ema mai barak fo’er fali. Atu di’ak liu ita-nia Governu mak jere, hadi’a hotu halo di’ak tiha, rekruta ema serbisu iha ne’ebá para kuidadu sasán sira ne’e, bainhira ema ruma atu estraga mós labele tanba sira iha ne’ebá”, nia sujere.
Bee-Manas Marobo lokaliza iha foho llat-laun nia hun, iha munisípiu Bobonaro, rekoñese nu’udar fatin destinasaun turístika, nune’e Sekretaria Estadu Formasaun Profisionál no Empregu (SEFOPE) liuhusi Projetu Turizmu Komunitáriu reabilita no moderniza ona infrastrutura bázika husi ninia orijinalidade.
Lembra katak Bee-Manas Marobo reabilita iha tempu Sekretáriu Estadu Formasaun, Profisionál no Empregu (SEFOPE), Ilídio da Costa Ximenes, iha 2015, ho totál kustu $498,860 no inaugura iha loron 08 Dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão.
Notísia relevante: Bee-Manas Marobo ‘anti materiál fabrikadu’
Jornalista: Sergio da Cruz
Editora: Maria Auxiliadora
