ME promove formasaun kona-ba reforma kurrikulár ensinu báziku ba dirijente sira

DILI, 29 Outubru 2025 (TATOLI)—Ministériu Edukasaun (ME) liuhusi Diresaun Gabinete Kurríkulu Unidade Nasionál hamutuk ho Institutu Nasionál Formasaun Dosente no Profisionál Edukasaun (INFORDEPE), Kuarta ne’e, promove formasaun ba dirijente nasionál no munisipál kona-ba reforma kurrikulár ba Ensinu Báziku (EB) 7^o ano.

Prezidente Institutu Nasionál Formasaun Dosente no Profisionál Edukasaun, Domingos Martins hateten atividade referida hanesan faze preparasaun ba formasaun ne’ebé sei realiza iha tinan ne’e.

“Tanba ne’e, ami konvida diretór no superiendente, xefe departamentu ensinu báziku inklui koordenadór no formadór sira, atu disemina informasaun ba implementasaun kurríkulu ensinu báziku ba 7^o ano, ne’ebé sei implementa iha tinan 2026. Nune’e, ba tinan ne’e hanesan tinan implementasaun formasaun ba dixiplina sanulu,” nia dehan ba jornalista sira iha resintu INFORDEPE, Balide, Kuarta ne’e.

Nia subliña, faze ida-ne’e iha inísiu fulan-Novembru, manorin 3.301 husi eskola ensinu báziku 322 mak sei partsipa formasaun ba reforma kurríkulu ba matéria sanulu.

Dixiplina sanulu (10) mak hanesan iha área dezenvolvimentu linguístika mak lian tétun, portugés no inglés. Iha área dezenvolvimentu sientífiku mak matemátika, siénsia fízika no naturál istória no jeografia. Iha área dezenvolvimentu sosiál ka pesoál mak edukasaun fízika, edukasaun artístika, edukasaun sívika, sidadania no direitu umanu, edukasaun relijiaun no morál inklui kompeténsia ba moris no traballu.

Iha fatin hanesan, Koordenadór Gabinete Unidade Kurríkulu Nasionál ME, João Maupelu hateten ohin parte ME halo diskusaun ho autoridade edukasaun munisípial hodi sensibiliza kurríkulu ensinu báziku 7^o ano nian.

“Ohin diskusaun ho autoridade edukasaun munisipál no superintendente sira atu sensibiliza kurríkulu 3^o siklu, ho objetivu atu orienta edukasaun iha munisípiu,” nia haktuir.

Jornalista: Osória Marques

Editór: Xisto Freitas da Piedade