Autoridade Kovalima apoia nesesidade bázika ba família vulneravél iha Zumalai
KOVALIMA, 30 Outubru 2025 ( TATOLI) – Autoridade Kovalima apoia nesesidade bázika ba família vulnerável na’in-26 iha Administrativu Zumalai, munisípiu Kovalima.
Nesesidade bázika ne’ebé família vulnerável simu ne’e entrega direta husi Prezidente Autoridade Munisípiu Kovalima, Miguel Armada Cardoso, Koordenadór Komisaun Jestaun Dezastre Munisipál, Filomeno Cardoso, Komandante APC no parseiru sira.
Benefisiária, Rosita de Jesus, sente kontente bainhira autoridade Kovalima rejista nia naran hodi simu nesesidade bázika, nune’e bele aguenta han bá loron semana ida tanba durante ne’e nia sente nia responsabilidade todan.
“Ami simu nesesidade bázika ami ne’ebé ho kondisaun feto faluk sira ne’ebé haree ba responsabilidade boot maka bele simu, nune’e bele hakman netik ami”, Rosita de Jesus hato’o ba jornalista hafoin simu nesesidade bázika, iha EBC Suku Tashilin, Postu Zumalai.
Nesesidade Bázika ne’ebé maka família vulnerável simu kada familia vulnerável hetan saku foos kilograma 25 ida, supermie, sabaun, rinso, kafe, masi-midar no nesesidade sira seluk.
Iha fatin hanesan, Diretór Servisu Munisipál Protesaun Sivil Jestaun Dezastre Naturál, João Martins dehan Autoridade Kovalima distribui nesesidade bázika ba komunidade sira iha ámbitu selebra internasionál redusaun risku ba dezestre.
“Ita distribui nesesidade bázika ba ita nia família vulnerável sira iha suku Tashilin hamutuk família 26 ho tipu vulnerável hanesan inan-faluk, ema ho defisiente, divorsiu seidauk hetan apoiu husi Governu merese atu hetan apoiu”, nia esplika.
Durante ne’e, autoridade Kovalima liuhusi Servisu Munisipál Protesaun Sivil Jestaun Dezastre Naturál kobre ona suku sira ne’ebé maka afeita ba dezastre naturál hanesan ahi-han uma, rai halai, inundasaun
Jornalista:Celestina Teles
Editór:Florencio Miranda Ximenes
