VIKEKE, 30 Outubru 2025 (TATOLI)—Administradór Postu Administrativu Lakluta, Munisípiu Vikeke, Pascoal Gama Martins solisita Servisu Ministériu Agrikultura, Peska, Pekuária no Floresta (SMAPPF) Munisípiu Vikeke atu rekruta estensionista hodi apoiu agrikultór sira iha suku.
“Estensionista balun idade atu tama ba reforma ona, nune’e ha’u husu MAPPF Vikeke atu tau planu ba tinan 2026 rekruta estensionista foun, liuliu ita-nia oan sira-ne’ebé ramata ona sira-nia estudu iha área agrikultura hodi reforsa ita-nia agrikultór sira iha baze,” Pascoal Gama Martins ba TATOLI iha Postu Vikeke Vila, Kinta ne’e.
Iha fatin hanesan, Xefe Suku Uma-Ki’ik, Postu Vikeke Vila, Claudino Amaral haktuir estensionista ne’ebé destaka iha suku rua, Suku Uma Ki’ik no Bibileo, hasoru difikuldade ba transporte atu hala’o servisu iha baze.
“Iha ha’u-nia suku estensionista na’in-ida (1) mak kobre ba suku rua. Difikuldade ne’ebé ita-nia estensionista enfrenta mak tranporte. Ha’u husu ba SMAPPF atu apoiu transporte (motorizada) ba estensionista atu uza ba halo servisu iha baze,” nia hato’o.
Hatán ba preokupasaun ne’e, Diretór SMAPPF Munisípiu Vikeke, Olívio Soares Freitas informa, kona-ba preokupasaun estensionista, kada tinan tau planu rekruta estensionista, maibé liga mós orsamentu aloka mak la to’o.
“Tan ne’e mak ita labele halo rekrutamentu. Planu ne’ebé ita iha la’o tuir orsamentu ne’ebé aloka ba Diresaun SMAPPF Vikeke. Kuandu orsamentu la to’o ita labele rekruta,” nia akresenta.
Tuir dadus, estensionista ne’ebé iha SMAPPF Vikeke koloka ba kada postu hanesan Postu Lakluta ema na’in-rua (2), Ossu na’in-lima (5), Vikeke Vila na’’in-hitu (7), Uatulari na‘in-lima (5) no Postu Uatukarbau na’in-haat (4).
Jornalista: Vitorino Lopes da Costa
Editór: Xisto Freitas da Piedade
