Autoridade Ossorua solisita MAPPF normaliza irrigasaun ba natar ektare 100
VIKEKE, 30 Outubru 2025 (TATOLI)—Xefe Suku Ossorua, Postu Administrativu Ossú, Munisípiu Vikeke, Eduardo A. Freitas husu Ministériu Agrikultura, Peska, Pekuária no Floresta (MAPPF) normaliza irrigasaun ba natar ektare 100 ne’ebé daudaun ne’e abandonadu.
“Iha ami-nia suku natar hamutuk ektare 100 mak daudaun ne’e abandonadu maski rai bokur, impaktu husi irrigasaun aat. Tanba ne’e mak ha’u husu ba MAPPF se bele tau planu hodi normaliza irrigasaun no konstrui morru protensaun hodi proteje irrigasaun, atu agrikultór halo fali sira-nia natar,” Xefe Suku Ossurua ba TATOLI iha Postu Vikeke Vila, Kinta ne’e.
Eduardo haktuir katak natar parte Ossorua abandonadu dezde tinan 2009 to’o agora.
Nia hatutan foin lalais tékniku sira husi parte MAPPF halo levantamentu ona ba irrigasaun referida, maibé seidauk normaliza.
Hatán ba preokupasaun ne’e, Diretór SMAPPF Munisípiu Vikeke, Olívio Soares Freitas hateten preokupasaun Autoridade Ossorua kona-ba natar Anau no Bikaliu ne’ebé abandonadu tékniku sira ba haree ona.
“Se ita halo barajen natar barak mak mota sei lori. Nune’e, preokupasaun sira-ne’e ita sei haree no tempu badak ita sei mobiliza eskavatór hodi normaliza uluk irrigasaun hodi kanaliza bee ba natar, atu agrikultór sira bele halai sira-nia natar. Depoiz bá-oin ita-nia enjiñeiru sira sei halo estudu viablidade hodi haree irrigasaun oinsá mak konstrui,” nia hato’o.
Tuir dadus, Suku Ossorua iha aldeia hamutuk ualu (8), totál populasaun 2.510 no uma-kain 560.
Jornalista: Vitorino Lopes da Costa
Editór: Xisto Freitas da Piedade
