Lautein, 30 Outubru 2025 (TATOLI)—Primeiru-Ministru, Kay Rala Xanana Gusmão, husu ba autoridade lokál sira atu prezerva tasi no dezenvolve turizmu komunitária iha Com, Illa Jaco no Lore atu atrai turista domestika no estranjeiru mai vizita fatin sira-ne’e.
Primeiru-Ministru, Kay Rala Xanana Gusmão, hateten kona-ba ekonómia azúl, nia la koñese Timor laran tomak maibé nia koñese de’it fatin balun hanesan husi Com ba to’o illa Jaco no Loré nian, imi tenke buka prezerva tasi moos tanba fatin sira-ne’e sai hanesan fatór ida atu investe iha setór turizmu komunitária hodi hetan osan.
Turizmu komunitária la presiza konstrui otél boot-boot maibé inisiativa husi komunidade rasik atu konstrui, importante bele garante seguransa no fasilidade ne’ebé di’ak ba turista sira.
“Hanesan bainhira turista sira mai oferese hahan lokál husi Lautein nia rasik, la’ós ba sosa fali husi munisípiu seluk mak lori mai hodi fó fali ba turista sira konsumu,” Primeiru-Ministru informa ba jornalista sira iha ninia diskursu, ámbitu halo lansamentu fatuk dahuluk projetu reabilitasaun estrada dirasaun Lautein bá Com, sesta ne’e.
Xefe Governu ne’e dehan, tanba bainhira turista sira sente atraidu no sira sei mai nafatin vizita imi-nia fatin liuliu ho kondisaun tasi ne’ebé mak moos.
“Ida-ne’e sei sai motivu ida ba ekonómia azúl, nune’e imi labele soe plástiku arbiru ba tasi laran,” nia esplika.
Iha biban ne’e, Prezidente Autoridade Munisípiu Lautein, Mélio de Jesus, hateten durante ne’e sira mós estabelese regra ida iha sira-nia programa munisipál atu hamoos foer iha tasi kada fulan ida dala ida.
“Iha programa ne’e entidade hotu-hotu kompostu husi autoridade lokál no komunidade sei tun ba tasi ibun hodi hamoos foer iha tasi ibun, entaun sirkulár ida-ne’e la’ós de’it ba komunidade hela besik tasi ibun maibé sira-ne’ebé mós hela iha foho atu kuidadu ambiente tanba bee ne’e sulin husi foho leten mak tun mai,” nia informa.
Enkuantu, bainhira komunidade la kumpre sei iha sansaun ho termu administrativu ka prosesa tuir lei, bainhira komunidade la halo tuir inisiativa husi Governu nian mak sira sei halo pedidu administrasaun nian.
Jornalista : Alexandra da Costa
Editór : Cancio Ximenes
