LAUTEIN, 31 Outubru 2025 (TATOLI)—G vernu liuhusi Bee Timor-Leste, Empreza Públika (BTL, E.P) hahú implementa sistema foun ba fornesementu bee-moos hodi uza filtrasaun iha Lospalos ne’e, fó benefísiu ba uma ka’in 3,915 ho totál populasaun hamutuk 39,873.
Prezidente Bee Timor-Leste, Gustavo da Cruz, hateten projetu melloramentu sistema bee-moos iha kapitál munisípiu sira-ne’e foin halo implementasaun dahuluk iha Timor-Leste hahú husi munisípiu Lautein.
“Ohin, ita halo asina akordu ba kontratu ho kompañia manán-na’in no projetu ne’e apoiu husi fundu impréstimu ADB nian,” Prezidente BTL ne’e informa ba jornalista sira iha Lautein, ohin.
Nia relata, normalmente bee ne’e sei sai durante 24 orás no sistema bee ida-ne’e sei halo bee ne’ebé kualidade ba hemu nian katak la’ós bee moos de’it maibé bele uza hemu ho maneira diretamente, signifika komunidade bele loke torneira iha fatin públiku hodi hemu.
“Ida-ne’e ita halo tratamentu ba bee hemu nian, entaun kapaitál munisípiu sira ita sei dezenvolve hotu ho sistema foun ne’e, no ita garantia komunidade bele asesu tanba kuantidade bee ne’e 2040,” nia hateten.
Enkuantu bee ne’ebé sira halo perfurasaun husi bee-matan Papapa no sei mistura ho bee rai okos ka bee posu hitu ho kapasidase litru 99, sei konstrui mós tanke rezervatóriu lima ho totál volume 4,400 metru kúbiku.
“Maneira kontrolasaun ne’e ho manuál bainhira tékniku sira la’o iha dalan haree fallansu ruma ba kanalizasaun sira no persaun bee nian bele haree husi control room ne’ebe uza teknolojia avansadu hodi deteta lalais,” nia esplika.
Nia hatutan, projetu ne’e mós hetan ona lisensiamentu ambientál husi Autoridade Nasionál Lisensiamentu Ambientál (ANLA) liga ba komunida nia plantasaun ruma no halo ona reasentamentu ka indemnizasaun ba komunidade afetadu na’in-neen.
“Tuir mai ami sei halo lansamentu hanesan iha Same, no ami-nia planu atu halo inaugurasaun iha kapitál postu sira hanesan Ossú, Zumalai no seluk tan ne’ebé tama ona iha lista,” nia informa.
Projetu ne’e sei implementa husi kompañia internasionál Beijing Urban Construction Group ho durasaun tempu tinan tolu, ne’ebé prevee ho orsamentu hamutuk $17.012.327,59.
Jornalista : Alexandra da Costa
Editór : Cancio Ximenes
