VIKEKE, 31 Outubru 2025 (TATOLI)–inaugura ona iha Sesta ne’e uma-lisan Makaleha, iha Aldeia Abadere, Suku Babulu, Postu Administrativu Uatulari, Munisípiu Vikeke.
Objetivu husi inaugurasaun ne’e atu harii hikas patrimóni beiala sira-nian, ne’ebé sai hanesan fatin halibur família hodi koñese jerasaun bá jerasaun sira.
Uma-lisan referidu inaugura husi Reprezentante Sekretáriu Estadu Arte no Kultura, atuál Diretór Jerál Interinu SEAK, João Fátima da Cruz.
João haktuir haktuir Governu la’ós fó apoiu ba konstrusaun uma-lisan, maibé apoiu orsamentu ba serimónia inaugurasaun.
“Apoiu orsamentu ne’e bazeia ba proposta ne’ebé komunidade hato’o ba Sekretaria Estadu Arte no Kultura (SEAK). Nune’e, ba inaugurasaun ba uma-lisan Makaleha, SEAK fó apoia fundu hamutuk $1.500,” João Fátima ba jornalista sira iha Aldeia Abadere.
Nia dehan, Governu liuhusi SEAK fó prioridade ba patrimóniu kulturál sira hanesan uma-lisan sira-ne’ebé sai hanesan identidade kultura iha nasaun Timor-Leste.
Iha fatin hanesan, lia-na’in husi uma-lisan Makaleha, Manuel Pinto Amaral hateten konstrusaun uma-lisan Makalehan iha odamatan rua no ahi-matan rua (feto nian ida no mane nian) ida nune’e bainhira tempu sau batar no sau hare hasa’e bua no malus hodi fahe ba fetosan no umane sira, atu fó matak-malirin ba jerasaun sira.
“Ami-nia uma lisan ne’e uma tolu, maibé ami-nia beiala ida de’it mak fahe ba oan mane na’in tolu ho lisan ida. Tan ne’e mak ami konstrui hikas para tempu sau batar no sau hare jerasaun bele halibur malu no fahe malus no bua hodi fó matak-malirin ba jerasaun sira,” nia hato’o.
Aleinde ne’e, jerasaun foun husi uma-lisan Makaleha, Abraõ Mariano subliña prosesu konstrusaun uma-lisan lori tempu naruk, maibé konsege finaliza tanba fetosan no umane sira-nia hamutuk hodi konklui uma-lisan.
“Ha’u sente kontente no agradese tanba ami bele konklui ami-nia uma lisan ida-ne’e. Harii uma-lisan ne’e ami hatutan beiala sira-nia obra nune’e ami jerasaun ba jerasaun hamutuk hodi halo inaugurasaun,” nia tenik.
Enkuantu, reprezentante fetosan husi uma lisan Makaleha, Marcelino Amaral sente orgullu tanba bele harii hikas uma-lisan ne’ebé iha tempu okupasaun Indonézia ema sunu tiha ne’e.
“Ho konstrusaun ida-ne’e fetosan hotu-hotu sei mai konsentra hotu iha uma-lisan ida-ne’e hodi simu matak-malirin,” nia informa.
Entretantu, serimónia inaugursaun ne’e partisipa husi autoridade lokál, ekipa SEAK, família husi uma-lisan Makaleha, fetosan no umane sira.
Jornalista: Vitorino Lopes da Costa
Editór: Xisto Freitas da Piedade
