ERMERA, 02 Novembru 2025 (TATOLI) – Amu selebrante, António Martins ‘Bong’ husu ba família sira atu halo orasaun ba matebian sira-ne’ebé hela iha purgatóriu nune’e sir abele hetan moris rohan laek.
Maibé tuir nia, molok selebra loron finadu keta haluhan mós loron ida-ne’ebé bolu loron Santu no Santa ne’ebé sempre selebra iha loron 01 Novembru.
“Tanbasá mak ita selebra loron finadu 02 Novembru, tenke selebra uluk loron Santu no Santa tanba ita hanoin filafali katak Santu no Santa sira-ne’e maihusi matebian hotu ne’ebé bainhira sei moris iha mundu, hetan fiar husi Maromak nune’e sira mate klamar hetan moris rohan laek,” António Martins “Bong” hateten iha Kapela Saun Pedro no Saun Paulu iha aldeia Kokua, suku Railaku-Kraik, postu administrativu Railaku, munisípiu Ermera.
Nia esplika, Santu no Santu sira mak mai husi ema ne’ebé fiar-na’in ne’ebé tama lalehan tanba Maromak loke lalehan ba ema sira-ne’ebé hamutuk ho Na’in Feto tuir Jesus.
“Santu no Santu mak ema ne’ebé la preokupa moris no rikusoin mundu nian maibé sira mak tuir Maromak iha mundu ne’e, entaun sira soi buat hotu atu hola parte iha Maromak nia glória iha lalehan,” Padre ne’e fó hanoin ba sarani-sira.
Tanba ne’e ohin loron finadu, loron rua ne’e importante no kesi ba malu, Maromak hakarak hotuhotu tau konfiansa iha nia nune’e mate bele hetan moris rohan laek.
Tanba Maromak rasik hakotu lia liuhusi Jesus dehan ‘sé mak tuir no haree ha’u mak sei hetan moris rohan laek. Maromak mak dalan lalehan, hakarak tama lalehan husik Maromak ukun imi hanesan Santu no Santa sira sira hotu.”
“Ohin ita reza ba matebian sira ne’ebé seidauk tama lalehan, sira hela iha purgatóriu tanba moris halo tuir de’it sira-nia hakarak, lakohi tuir Maromak entaun hela iha purgatóriu. Oinsá sira atu tama lalehan mak hasa’e orasaun ba Maromak liuhusi sakrifísiu Jesus nian bele salva sira hetan rohak laek,” nia haklaken.
Nia haktuir, atu salva matebian sira tama lalehan, labele husi maneira seluk, maibé liuhusi orasaun tanba atu tama lalehan só Maromak mak bele hatene tanba ne’e tenke hasa’e karan ba nia.
“Bainhira ita moris halo tuir ita-nia hakarak mak ita sei lakon ita-nia klamar tama lalehan. Husu ita hotu reza ba matebian sira-ne’ebé seidauk tama lalehan, bele tama lalehan nune’e reza mós ba ita-nia an halo tuir Maromak nia hakarak nune’e bainhira mate bele hetan moris rohan laek,” Padre ne’e konklui.
Jornalista : Arminda Fonseca
Editór : Evaristo Soares Martins
