BAUKAU, 02 novembru 2025 (TATOLI) – Selebrasaun finadu ba tinan ne’e iha Postu Administrativu Laga, Munisípiu Baucau, la’o ho hakmatek tanba hetan seguransa másimu husi PNTL Eskuadra Laga.
“Ha’u atu fó-sai informasaun kona-ba selebrasaun loron finadu nian hahú horisehik no ohin situasaun la’o hakmatek no kontroladu,” Segundu Komandante Eskuadra Laga, Carlos Miguel, ko’alia iha Laga, domingu ne’e.
Segundu Komandante Eskuadra Laga ne’e fó-sai katak, hahú husi suku Atelari to’o suku Tekinomata situasaun la’o di’ak no hakmatek.
“Ligadu ba ami-nia servisu mak ami servisu 24 oras hodi fó seguransa ba komunidade sira, liuliu halo patrullamentu no buat hotu la’o ho di’ak,” ‘nia relata.
Nia dehan, kazu balun ne’ebé rejista iha loron 01 fulan-novembru konsidera kazu sivíl tanba haksesuk malu ba rai.
“Situasaun ein-jerál postu adminsitrativu Laga buat hotu la’o ho di’ak no ami parte Eskudra Laga la servisu mesak, maibé ami pasa informasaun ba grupu GAM sira-ne’ebé mak iha, katak tenke koopera iha loron finadu hodi hamutuk ho família ho di’ak,” ‘nia hateten.
Entretantu membru polísia Eskuadra Laga hamutuk 13 hodi hala’o servisu seguransa iha loron finadu.
Tuir obsevasaun jerál ne’ebé Jornalista TATOLI identifika, hahú kedas loron 01 Novembru família sira husi Dili ba Baucau Vila no husi Baucau Vila ba Laga, nune’e mós husi Laga ba idaidak nia knua hodi selebra finadu hamutuk ho família no kari ai-funan ba rate.
Jornalista : Felicidade Ximenes
Editór: Evaristo Soares Martins
