DILI, 04 Novembru 2025 (TATOLI)—Komandu Polísia Nasionál Timor-Leste (PNTL) louva ho maturidade juventude ne’ebè kria pás no estabilidade durante selebrasaun loron finadu iha Munisípiu Baukau.
Komandante PNTL Munisípiu Baukau, João Sancho Pires, haktuir situasaun jerál iha Baukau kontroladu durante loron finadu iha-ne’ebé parte seguransa hala’o patrullamentu konjuntu entre PNTL kompostu Task Force, Batallaun Orden Públika (BOP) Kompañia Bravo no FALINTIL-FDTL.
“Lori komandu nia naran apresia no louva komunidade Baukau tomak ne’ebé kontribui ba selebrasaun loron finandu husi 01 to’o 02 Novembru,” Komandante PNTL Munisípiu Baukau hateten iha ninia kna’ar fatin, Vila Nova, Baukau, Tersa ne’e.
Superintendente Pires hato’o mós agradesimentu ba autoridade lokál hanesan administradór postu administrativu ualu, xefe suku, veteranu inklui komunidade jerál ne’ebé kontribui ona ba estabilidade iha Baukau.
Mezmu nune’e, Superintendente Pires rekoñese mosu insidente ki’ik hafoin iha dezentendimentu iha semitériu área Kaibada, Postu Administrativu Baukau Vila maibé parte seguransa konsege atua no situasaun kontrola hikas.
“Ita atua kedas kazu sira-ne’e. Agora daudaun prosesu hela. Ne’e la prejudika ba finadu nian,” Superintendente Pires akresenta.
Entretantu, PNTL Baukau liuhosi Seksaun Tránzitu rejistu asidente rua hanesan iha área Postu Administrativu Matebian ne’ebé rezulta ema ida hetan tohar iha parte ain no asidente iha Buruma husi diresaun Munisípiu Lautein ba Dili bainhira xoke bibi hodi rezulta motorista hetan kanek.
Jornalista: Natalino Belo
Editór: Xisto Freitas da Piedade
