Tribunál kondena arguidu AdD ho prizaun tinan-10
DILI, 04 Novembru 2025 (TATOLI)–Tribunál Judisiál Primera Instánsia Dili (TJPID), Tersa ne’e, liuhusi leitura akordaun, deside aplika pena prizaun tinan-10 ba arguidu ho inisiál AdD tanba faktu provadu katak arguidu baku besi ba matebian nia ulun nune’e hakotu iis kedan iha fatin, iha Fevereiru 2025.
Akordaun ne’e fundamenta katak, arguidu nia aktu priense duni krime ne’ebé Ministériu Públiku imputa ba nia, maibé sei tetu ho sirkunstánsia sira hotu no ikus mai deside hodi aplika pena prizaun tinan-10 ba arguidu.
Iha sala julgamentu, defeza arguidu AdD, Defensór Públiku Fernando da Costa konsidera katak pena ne’ebé mak Tribunál kondena ba nia kliente ne’e adekuadu ona, nune’e hanesan Defeza la halo rekursu hasoru desizaun Tribunál.
“Tribunál aplika tinan-10, kazu ne’e omesidu simples nia moldura penál ne’e husi tinan-ualu to’o 20, no Ministériu Públiku husu atu aplika tuir moldura penál ne’ebé iha, no ha’u husu Tribunál atu aplika pena husi tinan-ualu ai kraik. Sé Tribunál aplika tinan-10 ne’e sufisiente ona,” nia akresenta.
Notísia relevante : Tribunál aplika medida kausaun ba arguidu na’in-lima ne’ebé lori osan no mina ilegál mai Timor-Leste
Fernando fundamenta katak, hanesan Defeza husi arguidu, nia parte esklarese ona ba iha família katak arguidu sei enfrenta prosesu sira ne’e.
“Tanba ne’e família mós aseita ho desizaun Tribunál no aseita mós atu la halo rekursu hasoru desizaun ne’e,” nia informa.
Kazu omesidu simples ne’e akontese direta kedan no arguidu mós konfesa seim rezerva ba Tribunál katak, nia maka baku besi ulir hodi rezulta vítima hakotu iis kedan iha fatin akontesimentu.
Jornalista : Natalino Costa
Editór : Evaristo Martins
