MPIE konsulta autoridade Kovalima kona-bá elaborasaun PMOT
KOVALIMA,O5 Novembru 2025 ( TATOLI) – Ministériu Planiamentu no Investimentu Estratéjiku (MPIE) liuhusi Diretór Nasionál Ordenamentu Espasiàl, realiza workshop durante loron tolu atu rona autoridade Kovalima nia hanoin kona-bá elaborasaun Planu Munisípiu Ordenamentu Territóriu (PMOT) iha Munisipiu Kovalima.
“Ita realiza iha ámbitu elabora Planu Ordenamentu Munisípiu Kovalima, ne’ebé tama ona iha faze karaterizasaun diagnóstika buka atu halo definisaun perimétru urbanu postu Suai”, Diretór Nasionál Ordenamentu Espasiàl,Fertinal Alves dehan ba Jornalista iha salaun AMC, ohin.
Razaun konsulta ne’e dahuluk atu halo aprezensaun kona-bá kritériu molok define perimétru urbanu rasik no rona autoridade sira kona-ba programa, projetu no projesaun área urbana Suai.
Daruak rona pontu devista husi konsulta ne’e maka hamosu planu ordenamentu Kovalima atu aprezenta kona-bá kritériu no datoluk kompleta ho vizita ba tereñu parte ne’ebé maka importante hodi tau atensaun molok atu define perimétru urbanu hanesan haree ba setór agrikultura, pekuária, ambiente no sira seluk presiza haree molok define.
Entidade sira ne’ebe maka partisipa iha eventu referidu hanesan Autoridade Kovalima ho nia diretór servisu munisipál, diretór delegasaun territoriál, Administradór Postu Administrativu hitu no sosiedade sivil.
Projetu ba eloborasaun PMOT manan husi konsultan husi Indonézia ekipa husi Bandung, Kupang, parseiru hamutuk konsultan husi Timor-oan rasik hafoin define modelu ordenamentu adekuadu ba Kovalima.
Iha fatin hanesan, Prezidente Autoridade Munisípiu Kovalima, Alberto Moniz de Araujo, louva Ministériu Planeamentu no Investimentu Estratéjiku (MPIE) tanba bele realiza enkontru ne’e hodi hala’o konsulta kona-ba elaborasaun planu urbanu iha Kovalima .
Notisia relevante:MPIE diskute ho autoridade postu kona-ba elaborasaun PMOT iha Suai
Jornalista: Celestina Teles
Editór : Florencio Miranda Ximenes
