DILI, 05 Novembru 2025 (TATOLI)—Primeiru-Ministru, Kay Rala Xanana Gusmão, konsidera debate Orsamentu Jerál Estadu (OJE) 2026 la’ós atu sura de’it númeru maibé atu fó sentidu no simu responsabilidade kona-ba investimentu.
Notísia Relevante: Proposta OJE 2026: Governu kontinua prioriza diversifikasaun ekonómika
“Ho sentidu boot kona-ba dever ho responsabilidade mak ha’u mai dirije ba ilustre audiênsia ida-ne’e atu apresenta Proposta Lei kona-ba Orsamentu Jerál Estadu ba tinan 2026,” Primeiru-Ministu, Kay Rala Xanana Gusmão, hateten iha diskursu ba debate OJE 2026 iha faze jeneralidade ne’ebé hala’o iha PN, ohin.
Xefe Governu hateten, ida-ne’e laiha dúvida maibé ne’e hanesan momentu xave ida iha Estadu nia moris, debate kona-ba instrumentu ida liuliu jestaun finanseira ho nia estratéjia ho eskolla polítika ba nasaun, iha ezersísiu demokrátiku ida-ne’ebé halo diskusaun kona-ba eskolla hirak-ne’e.
Primeiru-Ministru dehan, debate kona-ba Orsamentu Jerál Estadu la’ós de’it sura númeru maibé mai mai iha-ne’e atu fó sentidu ba númeru hirak-ne’e no atu simu responsabilidade kona-ba investimentu ne’ebé atu kontribui lori hadi’a povu nia moris, atu hakbiit no dezenvolve nia ho forma saudável, instruída no empreendedora.
Notísia Relevante: Infografia: Proposta OJE 2026 ho montante $2.214.689,195
“Ita mai iha-ne’e atu implementa planu estratéjiku ida, ne’ebé trasa tiha ona iha 2011, ho hanoin kona-ba kontinuidade iha polítika, projetu ho reforma, tanba ida-ne’e mak únika forma atu bele alkansa vizaun kona-ba desenvolvimentu nasionál,” nia dehan.
Orsamentu ida-ne’e mak hanesan povu no Timor-Leste nia istória hodi harii sira-nia futuru, ho nune’e prontu atu halo debate kona-ba Orsamentu Estadu ida-ne’ebé ponderadu ho eklibradu, maibé bele sai di’ak-liu ho lontribuisaun husi Distintu Deputadu sira.
“Debate demokrátiku anuál kona-ba orsamentu Estadu, hanesan teste ida ba forsa husi ita-nia demokrásia, ne’ebé orgaun soberania sira hamutuk iha objetivu komun atu hadi’a vida ekonómiku no sosiál nasaun nian,” nia hateten.
Enkuantu diakusaun no votasaun iha faze jeneralidade durasaun loron tolu hahú husi kuarta (05 Novembru 2025) to’o sesta (07 Novembru 2025).
Notísia Relevante: OJE 2026: La’o Hamutuk rekomenda Governu tau prioridade ba problema estruturál
Jornalista : Alexandra da Costa
Editór : Cancio Ximenes
