VIKEKE, 06 Novembru 2025 (TATOLI)–Diretór Seguransa Alimentár Munisípiu Vikeke, Leanto Gomes informa koziña ba Programa Merenda Eskolár (PME) maioria kondisaun aat.
“Durante ne’e ami halo fiskalizasaun ba PME katak maioria koziña grave tebes mak ita-nia ekipa jestaun programa merenda eskolár sira uza hodi prepara ai-han ba estudante sira,” Leanto Gomes ba TATOLI iha ninia knaar fatin, Administrasaun Munisípiu Vikeke, Kinta ne’e.
Nune’e, Leanto hatutan, Diresaun Seguransa Alimentár hamutuk ho ajénsia internasionál KOICA no UN WFP (World Food Programme) hala’o enkontru ona ho Prezidente Autoridade Munisípiu Vikeke hodi relata kondisaun koziña referida.
“Ita-nia planu iha tinan 2026 ajénsia rua (KOICA no UN WFP) liuhusi projetu Kitchen Construction atu konstrui koziña hamutuk unidade ualu ba programa merenda eskolár iha Munisípiu Vikeke,” nia hato’o.
Aleinde ne’e, nia dehan, parte Diresaun Seguransa Alimentár mós relata kondisaun koziña ne’e ba xefe suku sira hodi tau planu orsamentu iha Programa Nasionál Dezenvolvimentu Suku (PNDS) hodi konstrui koziña ba eskola sira-ne’ebé lokalizada iha suku.
“Tinan oin PNDS sei konstrui koziña ba programa merenda eskolár hamutuk unidade 18. Ha’u espera tinan oin ne’e bele realiza. Karik realiza duni ha’u sente di’ak ona,” Leanto informa.
Iha fatin ketak, Koordenadora Eskola Bázika Filiál (EBF) Ualake Sana, Antónia Silveiro Amaral, haktuir EBF Ualake Sana kondisaun koziña daudaun ne’e aat, udan-been tama de’it no fatin haloot ai-han mós laiha.
“Ami-nia koziña ne’e edifísiu eskola atinga nian ne’ebé kalén sira kuak hotu. Kuandu tempu udan, difikulta tebes ba implementasaun programa merenda eskolár. Tan ne’e, ami husu karik bele konstrui ami-nia koziña atu ami bele uza hodi prepara ai-han ba ita-nia oan sira ho ijiene,” nia sujere.
Tuir dadus, eskola sira-ne’ebé implemeta programa merenda eskolár hamutuk 95, kompostu husi husi EBC hamutuk 18 no EBF hamutuk unidade 77 ho totál estudante benefisiáriu hamutuk na’in-20.651.
Jornalista: Vitorino Lopes da Costa
Editór: Xisto Freitas da Piedade
