DILI, 06 Novembru 2025 (TATOLI) — Ministru Justisa (MJ), Sergio Hornai, hateten dezde mandatu iha 2023 atribui ona sertifikadu rai ba parsela hamutuk 103.
Nia esplika, direitu propriedade iha situasaun rua- ida pertense ba rai partikulár no seluk pertense ba domíniu privadu no domíniu públiku pertense ba Estadu.
País restaura indepedénsia tinan-23 atu rekoñese direitu sidadaun sira-nia hasoru komplesidade oioin.
“Governu Dasiak desde tinan 2023, atribui ona titularidade parsela 43, agora sa’e ba parsela 103 no daudaun iha fulan ida-ne’e ita sei fó tan por volta parsela 922, ba direitu titularidade ba rekoñesimentu diretu propriedade partikulár no direitu superifísiu, atubele konsede direitu sira ne’e ba uzu, lisensa, konsensaun no sujeita ba iha arrendamentu,” nia hato’o iha debate proposta Orsamentu Jerál Estadu (OJE) 2026 faze jeneralidade loron daruak iha Parlamentu, kinta ne’e.
Nune’e esforsu sira hala’o hela, tinan ne’e nia rohan bele atribui to’o parsela 702 ho progresaun ida maka’as.
“Serbisu ne’e koletivu, liuliu sira ne’ebé iha pose deklarante ba direitu propriedade koopera ho Diresaun Terras Propriedade,” nia hateten.
Hodi salienta, ministériu prioriza reajustamentu polítika jestaun rai nian ba parsela 32.611 ne’ebé identikadu iha lista baze dadus serbisu nasionál kadastrál nian.
Ministériu halo artikulasaun ho programa Governu Dasiak tau importánsia ba iha jestaun rai no iha liña koordenasaun interministeriál kompleta dadaun hodi halo reinterasaun ba dadus ne’ebé iha atu bele konsolida, identifika hodi halo rekoñesimentu atribuisaun direitu sira ne’e.
Fó mós arrendamentu ba iha setór privadu sira hanesan parseiru estratéjiku ba iha dezenvolvimentu ekonomia rai-laran.
Nia dehan, foin daudaun aprova tan dekretu-lei kona-ba Rejime Jurídiku Utilizasaun Domíniu Públiku Estadu no Domíniu Estadu nian.
“Ita halo lansamentu, investidór sira komesa dadaun, la kleur tan ita halo atribuisaun direitu utilizasaun propriedade rai ninian ba iha estalesimentu estaleiru iha Laleia,” nia katak.
Ida-ne’e oinsá diversifika polítika ba direitu propriedade tantu domíniu Estadu no partikulár atu bele hetan reseita.
“Halo mós atribuisaun direitu propriedade, iha vertente rua, direitu partikulár no halo rejistu direitu superfísiu, liliu domíniu públiku Estadu nian, seluk mak garante direitu ida-ne’e bele konverte direitu sira, hodi nune’e sidadaun sira bele asesu ba iha kréditu’’,Nia hateten.
Governu iha vizaun hodi halo regularizasaum ba asuntu rai iha komplesidade maibé neine’ik bele moderniza.
Jornalista: Nelson de Sousa
Editór: Evaristo Soares Martins
