DILI, 06 Novembru 2025 (TATOLI)—Diretora Ezekutiva JSMP, Ana Paula Marçal, husu ba Governu iha Orsamentu Jerál Estadu (OJE) 2026 ho montante billaun $2,2 ne’e tenke tau prioridade ba setór justisa liuliu ba rekursu umanu.
Notísia Relevante: JSMP husu Governu jere OJE 2026 ho di’ak hodi fó benefisiu ba povu
“Ami du’urante ne’e halo monitorizasaun ba servisu justisa nian liuliu iha servisu Tribunál nian, entaun ami rekomenda katak fó prioridade ba rekursu umanu ne’ebé ita ko’alia buat rua (2), kualidade ho kuantidade, ida-ne’e presiza haree,” Diretora ne’e hateten ba Agencia Tatoli iha edifisiu JSMP Kolmera, kinta ne’e.
Nia dehan, daudaun ne’e setór justisa iha área tribunál sei menus tebes rekursu umanu, ho nune’e OJE 2026 ho montante ne’ebé boot tau prioridade mós ba setór justisa hodi dezenvolve rekursu umanu.
“Ita-nia rekursu iha Tribunál menus tebes., kazu barak mak tau hamutuk iha ne’ebá. Ho kazu ne’ebé barak no ho rekursu ne’ebé uitoan implika mós ba sira hodi foti desizaun ne’ebé balun ladun justu,” nia dehan.
Nia hatutan, tenke loke nafatin sentru formasaun hodi fó formasaun ba autór Tribunál sira hodi aumenta númeru Juiz iha Tribunál sira.
“Sentru formasaun ba Juis sira tenke ho kualidade, maske ita hakarak ona kuantidade tenke garante mós nia kualiade, atu nune’e sira bele sai autór Tribunál ne’ebé profisionál hodi fó justisa ba ema hotu ho justu. Sira-ne’e ita labele hapara formasaun ba sira, sira nafatin aprende, osan aloka nafatin ba sira, la’ós formasaun dala ida de’it sai mai lae ona, ne’e labele tenke kontinua fó formasaun ba sira,” nia dehan.
Formasaun ba autór Tribunál sira bele hala’o iha rai-laran no bele mós hala’o iha estranjeiru, tanba dadaun ne’e mundu modernu presiza kapasita autór Tribunál sira tuir mundu ohin loron.
“Mundu agora la hanesan uluk, mundu agora dijitalizasaun, krime sira akontese dalabarak iha dijitál ita presiza hatene. Agora daudaun ema foti ema seluk nia osan la’ós fizikamente, maibé transfere liuhusi dijitál, liuhusi internet, entaun ita-nia autór Tribunál sira tenke iha koñesementu ba sasán sira-ne’e, ita labele manual beibeik. Tanba mundu dijitál no krime dijitál mós akontese barak, sa tan agora ita tama ASEAN, sasán sira-ne’e ita presiza aprende barak liuliu autór Tribunál sira,” nia hateten.
Entretantu, OJE 2026 ne’ebé aloka ba Ministériu Justisa (MJ) hamutuk $14.127,131, no husi orsamentu ne’e fahe ba saláriu vensimentu hamutuk $7.707,129, bens servisu hamutuk $5.604,415, kapitál menór hamutuk $350.000, kapitál dezenvolvimentu hamutuk $465.587 no transferensia públika zero.
Jornalista : Hortencio Sanchez
Editór : Cancio Ximenes
