Autoridade Kovalima alerta komunidade labele konstrui uma iha fatin risku ba dezastre naturál
KOVALIMA,04 Novembru 2025 (TATOLI)- Prezidente Autoridade Munisípiu (PAM), Kovalima Miguel Armanda Cardoso, alerta ba komunidade sira labele konstrui uma iha fatin ne’ebé maka risku ba dezastre naturál.
“Planu Programa Planu Munisipál Ordenamentu Territoriál (PMOT) bainhira ita atu kontrui uma presiza husu lisensa husi Estadu, nune’e bele miniza dezastre naturál. Alerta ba komunidade atu konstrui uma karik dook husi estrada ho metru 15 no labele konstrui iha mota ninin, konstrui uma labele besik ai-hun boot atu minimiza risku dezastre naturál”, Autoridade Kovalima, Miguel Armada Cardosa, hato’o ba jornalista sira iha Kovalima.
Autoridade Kovalima ne’e halo alerta ne’e tanba relidade hatudu bainhira halo observasaun komunidade sira konstrui uma besik estrada, mota ninin, tanba ne’e presiza atu kuidadu nune’e bele minimiza risku ba dezastre naturál.
Aleinde konstrui uma iha fatin risku dezastre naturál, nia alerta ba komunidade presiza mós kuida tasi tanba iha programa nasionál bolu dehan “Ha’u nia tasi, Ha’u nia Timor”, hodi kuida riku-soin tasi-nian.
“ Inan-aman sira atu kumprie desizaun ne’ebé ita iha, liuhusi vizita taballu ha’u disemina informasaun ho intensaun bainhira tempu udan no anin boot labele fó impaktu komunidade sira”, PAM Kovalima ne’e sujere.
Fó hanoin fali katak, iha loron 2 Juñu 2025 ne’e, Ministru Planu Investimentu Estratéjiku (MPIE), Francisco Gastão Sousa akompañia husi Sekretáriu Estadu Dezenvolvimentu Lokál Mateus dos Santos Tallo , Diretór Jerál Planu ordenamentu territóriu ho autoridade Kovalima hala’o abertura ofisiál Planu Munisipál Ordenamentu Territóriu (PMOP) iha munisípiu Kovalima.
Prosesu elabora ordenamentu territóriu sei identifika rai sira ne’ebé potensiál ba agrikultura ka ba investimentu sa ida de’it, nune’e investedór sira mai, autoridade sira indika rai sira ne’ebé mak presiza halo investimentu, Agrikultura no rai ne’ebé mak atu dezenvolve parte indústria, maibé presiza hamutuk atu hala’o investimentu ho oinsá.
Notisia relevante: Komunidade labele konstrui uma iha foho lolon hodi evita sedimentasaun
Jornalista: Celestina Teles
Editór : Florencio Miranda Ximenes
