OEKUSI, 06 Novembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), daudaun ne’e forma ona membru Korpu Isár Bandeira Nasionál (CIBN) hamutuk na’in-200 hodi prepara dirije selebrasaun loron proklamasaun independénsia 20 Novembru da dala-50 iha Oekusi.
Notísia relevante: Selebrasaun loron proklamasaun independénsia iha Oekusi sei konsentra iha suku ida-idak
Responsavel ba ekipa CIBN iha Oekusi, Vitór Manuel Neno, hateten, ekipa ne’e prepara ba membru hasa’e bandeira iha rejionál hamutuk na’in-55 sei envolve mós suplente, sira-ne’ebé sei koloka ba suku 20, na’in 100-resin, tanba kada suku sei koloka na’in-lima inklui ona suplente ho instrutór na’in-ida.
Nia esplika, membru ne’ebé sei koloka ba suku 20 maioria membru antigu sira-ne’ebé antes ne’e hetan ona uniforme husi nasionál dezde 2009 até agora, ho intensaun atu hatudu ba inan-aman sira iha suku no aldeia, tanba durante ne’e rona de’it sira-nia oan ba partsipa hasa’e bendera iha nasionál no rejionál.
“Ita prepara daudaun ona na’in-200 hanesan ne’e inklui suplente sira, atu evita karik durante preparasaun treina balun hetan dezastre ka apartente ruma karik bele substitui,” nia hateten iha kampu 01 de Maiu Palaban Oekusi, ohin.
Nia relata, kona oráriu treina, se kada loron tanba membru CIBN ne’e maioria estudante, no antes ne’e mós autoridade RAEOA koordena ho parte eskola ida-idak atu fó autorizasaun ba estudante ne’ebé identifikadu ona.
“Durante treina iha mós regulamentu ba membru sira, pontualidade no dixiplina sai prioridade, tanba sira mak responsabiliza sei másima durante komemorasaun hasa’e bandeira, tanba sei iha bainaka barak mai akompaña, ita tenke hatudu katak iha mós bele. Ne’ebé, ohin hahú ona to’o loron akontesimentu,” nia hato’o.
Prezidente Komisaun Organizadora ba komemorasaun 28 Novembru iha Oekusi, José Tanesib Anunu, iha esperansa katak, grupu CINB sei hatudu formatura rápida ho nasiolizmu nu’udar timoroan.
“Tenke preparadu balun sei konsentra iha rejionál Pante Makasar no balun sei dezloka suku atu hamutuk komunidade sira, ne’bé ita fiar katak, ita hotu sei hatudu ita-nia sentidu nasionalizmu ba ita-nia rai liuhusi loron istóriku ne’e,” nia hateten.
Entretantu, antes ne’e, Governu liuhusi reuniaun Konsellu-Ministru aprova lema “Que a celebrar estes 50 anos, do passado, nos assegure confiança no presente e esperança no futuro”, hodi komemora loron proklamasaun independénsia RDTL ba da-50 (28 Novembru 1975-28 Novembru 2025) ne’ebé unilateralmente proklama 28 de novembro de 1975.
Proposta ne’e aprezenta husi Ministru Administrasaun Estatál, Tomas do Rosário Cabral, iha reuniaun Konsellu Ministru no deside hodi aprova lema referidu, ne’ebé ho versaun lian tetun katak “Atu selebrasaun tinan 50, pasadu nian ne’e, fó mai ita konfiansa iha tempu prezente no esperansa ba tempu futuru”.
Jornalista: Abílio Elo Nini
Editór: Rafael Ximenes de A. Belo
