Governu atualiza preparativu tinan 50 Proklamasaun Independénsia ba Xefe Estadu
DILI, 07 Novembru 2025 (TATOLI)—Governu liuhusi Ministru Administrasaun Estatál (MAE), Tomas do Rosario Cabral, sesta ne’e, hasoru malu ho Xefe Estadu José Ramos-Horta hodi atualiza preparativu tinan 50 Proklamasaun Independénsia.
Notísia Relevante:Xanana-Horta hahú diskute preparasaun tinan 50 Proklamasaun Independénsia
“Enkontru ho Prezidente Repúblika kona-ba selebrasaun sira iha loron 28 fulan-Novembru, ne’ebé marka tinan 50 dezde ita selebra ita-nia proklamasaun independénsia. Selebrasaun sira sei hala’o iha teritóriu nasionál sira hotu. Iha Díli, Governu sentrál sei hala’o mós serimónia iha Palásiu Governu, tanba fatin proklamasaun nian,” Ministro Tomas hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia hateten, iha munisípiu sira hotu sei selebra tinan importante ne’e no iha Dili sei hala’o mós espozisaun iha Tasi-Tolu antes loron 28 Novembru.
“Konvidadu Estadu estranjeiru barak mak sei mai. Agora daudaun ami hein hela konfirmasaun, ajenda hotu haruka ona, ami mós notifika ona ami-nia embaixada sira iha estranjeiru hodi konfirma karik bainaka importante sira husi nasaun sira seluk sei partisipa,” nia hateten.
Antes ne’e, Reuniaun Konsellu Ministru Iha Loron o8 Fulan-Outubru aprova ona tema jerál ba Selebrasaun tinan 50 Proklamasaun Independénsia Repúblika Timor-Leste (28 Novembru 1975– 2025) mak “Que a Celebração destes 50, anos do passado, nos assegure confiança no presente e esperança no futuro“.
Jornalista : Hortencio Sanchez
Editór : Cancio Ximenes
