DILI, 07 Novembru 2025 (TATOLI)—Governu liuhusi Ministériu Asuntu Kombatente Libertasaun Nasionál (MAKLN) planeia sei lansa fatuk dahuluk projetu konstrusaun monumentu Saudozu Vicente Reis ‘Sahe’ iha finde tinan-ne’e.
Ministru Asuntu Kombatente Libertasaun Nasionál, Gil da Costa Monteiro ‘Oan Soru’ esplika sei hein finalizasaun dezeñu iha Ajénsia Dezenvolvimentu Nasionál (ADN) iha-ne’ebé sei finansia liuhusi fundu infraestrutura.
“Posibilidade tinan-ne’e ramata halo lansamentu maibé la’ós signifika tenke hahú ona konstrusaun. Parese tinan oin mak hahú konstrusaun,” Ministru Oan Soru informa ba TATOLI iha Parlamentu Nasionál (PN), Sesta ne’e.
Governante ne’e relata prosesu implementasaun projetu referidu tarde tanba falla iha parte téknika hanesan sei halo revizaun dezeñu jerál ba monumentu inklui fasilidade seluk iha obra referida.
Entretantu, konstrusaun monumentu ne’e tuir planu inklui kampa atu haloot urna Vicente Reis Sahe hamutuk ho espoza Wewe, harii sentru formasaun kulturál inklui muzeu iha área Suku Bukoli, Postu Administrativu Baukau Vila ho totál rai ektare rua.
Jornalista: Natalino Belo
Editór: Xisto Freitas da Piedade
