DILI, 07 Novembru 2025 (TATOLI)—Treinadór Prinsipál Selesaun Nasionál, José Pedro Salazar “Zé Pedro” anúnsia lista jogadór ne’ebé selesionadu iha ekipa nasionál Timor-Leste hamutuk na’in-27 ne’ebé sei kontra Tazaskistaun iha kualifikasaun AFC Asian Cup 2027.
Lista naran hirak-ne’e fó-sai hanesan parte preparasaun antes kontra Tazaskistaun ne’ebé tuir kalendáriu sei hala’o iha Darwin-Austrália, 18 Novembru.
Husi lista naran ne’ebé publika maioria jogadór sira-ne’ebé antes ne’e hola-parte iha line up bainhira Timor-Leste kontra Filipina iha fulan-Outubru liubá mezmu jogadór prinsipál na’in-rua esklui hanesan kapitaun ekipa Gali Freitas tanba razaun hetan kartaun kinur rua, enkuantu Mouzinho de Lima elemidadu tanba faze rekuperasaun fízika.
Aleinde ne’e, husi lista jogadór na’in-27, liña guarda rede iha aumentu ne’ebé reforsa husi jogadór Natalino Nunes husi klube As Ponta Leste, parte defeza jogadór ne’ebé reforsa mak Orcelito da Silva, Fernando Carvalho no Nelson Viegas ne’ebé substitui hikas jogadór tolu seluk hanesan Francisco da Costa, Mario Quintão no Ryan Zom.
Husi parte liña médiu, jogadór foun ne’ebé reforsa ekipa nasionál mak hanesan Palomito Ribeiro husi klube Emanuel FC hodi substitui Zenivio Mota, enkuantu liña avansadu ne’ebé antes ne’e prenxe husi Gali no Mouzinho substitui fali husi jogadór Alexandro Lemos husi AD SLB no Olagar Xavier substitui Mouzinho de Lima.
Tuirmai lista jogadór na’in-27 ne’ebé selesionadu atu kontra Tazaskistaun iha 18 Novembru:
Guarda rede: Dylan José Niski, Georgino Mendonça, Junildo Pereira, Natalino Nunes.
Defeza: Anizo Correia, Emidio Martins, Filomeno da Costa, João Soares, Nelson Viegas, Orcelito da Silva, Jackson Fowler no Fernando Carvalho.
Médiu: Santiago da Costa, Kornelis Nahak, Marques de Carvalho, Fretiliano Santos, Ejivanio da Costa, Cláudio Osório no Palomito Ribeiro.
Avansadu: Alexandro Lemos, João Pedro, Fabio Canovaro, Zenivio Mota, Olagar Xavier, Zion Cruz, Luís Figo, Vabio Pires no João Rangel.
Jornalista: Natalino Belo
Editór: Xisto Freitas da Piedade
