AILEU, 08 Novembru 2025 (TATOLI)-Arsebispu Arkiodioseze Metropolitana Dili, Don Virgílio Kardeál do Carmo da Silva, agradese ba Governu tanba reabilita ona kapela Nossa Senhora Maria Auxiliadora dos Cristãos, ne’ebé lokaliza iha suku Saboria, postu-administrativu Aileu, munisípiu Aileu.
Projetu reabilitasaun kapela ne’e hahú iha loron 01 fulan-Novembru 2024 to’o 31 Maiu 2025, husi empreza Quatro Colegas, Lda. Fundu ba projetu ne’e husi Ministrériu Obra Públika (MOP) ho montante $218.833,56.
“Ami nafatin agradese ba laran-luak ida ne’e bele harii kapela furak ba sarani, liuliu ba devotu Maria Auxiliadora sira. Ohin mós ha’u haree devotu balun mak iha ne’e ona”, Arsebispu hateten iha ámbitu inaugurasaun kapela iha suku Saboria, ohin.
Don Virgílio dehan igreja sai fatin ida atu halibur sarani sira hasa’e orasaun ne’ebé bele la’o hamutuk fiar, entaun sai sinál ida, tanba nu’udar ema fiar-na’in, uma-kreda sai fatin ba ema hotu ne’ebé la haree ba kór ka polítika ida nian.
“Iha kapela ida-ne’e ita hotu nu’udar sarani ne’ebé ninia mahein maka Na’in-Feto Maria Auxiliadora”, Arsebispu salienta.
Tanba ne’e, nia husu ba sarani sira atu tau-matan hodi garante fatin ne’e matak, nune’e tinan hirak mai tan bainhira vizita nafatin furak no ida-ne’e mak sinál gratidaun boot ida, la’ós simu de’it maibé tenke uza didi’ak.
Ministru Obra Públika, Samuel Marçal, hateten konstrusaun ne’e seidauk to’o tinan, maibé empreza aselera lalais, tanba igreja sai fatin ne’ebé atu transforma mudansa ba ema an, liuliu morál no atitude hodi dezenvolve nasaun.
“Ha’u dehan hanesan ne’e, liuliu ba joven sira atu respeita malu no prepara-an atu kontinua lidera nasaun ida-ne’e bainhira ami laiha hotu ona”, ministru apela.
Inaugurasaun kapela ne’e partisipa husi entidades sira husi Governu, igreja no mós sarani sira iha suku Saboria.
Jornalista: Alexandra da Costa
Editora: Maria Auxiliadora
