Serimónia rituál ba prosesu reabilitasaun estrada Kuluhun

DILI, 09 Novembru 2025 (TATOLI)-Primeiru-Ministru, Xanana Gusmão, akompaña husi Ministru Obra Públika, Samuel Marçal, Ministru Justisa, Sérgio Hornai no Sekretáriu Estadu Asuntu Toponímia no Organizasaun Urbana, Germano Brites, no lia-na’in sira Kuluhun halo serimónia rituál hodi husu lisensa ke’e sai hali abut.

Atividade kulturál ne’e halo hodi husu lisensa ba natureza atu labele impede konstrusaun estrada iha Kuluhun, tanba  daudaun hali abut perturba hela prosesu reabilitasaun estrada iha fatin ne’e, tanba ne’e orienta ona empreza Monta Diak hodi ke’e sai hali abut.

“Rai-na’in, rai-lulik, ami hamriik hein no ami respeita nafatin hodi tau-matan ba dalan ida-ne’e”, Xefe Governu hamulak ba natureza iha serimónia rituál ohin iha Kuluhun.

Lembra katak Governu daudaun halo alargamentu estrada husi Kuluhun to’o terminál Bekora ho luan metru 23,74 no naruk kilómetru 4.

Jornalista: Alexandra da Costa
Editora: Maria Auxiliadora