DILI, 10 Novembru 2025 (TATOLI)—Governu Timor-Leste liuhusi Ministériu Edukasaun (ME) hamutuk ho Embaixadór Portugál ba Timor-Leste, Segunda ne’e, inaugura projetu reabilitasaun saladeaula hitu (7) iha Eskola Ensinu Báziku Sentrál (EBC-sigla portugeza) Faról, Dili.
Ministra Edukasaun, Dulce de Jesus Soares konsidera serimónia referida hanesan momentu simbóliku no espesiál no marka inísiu ba etapa foun ida ba kooperasaun dinámika no produtiva entre nasaun rua.
“Ha’u fiar katak embaixadór foun nia to’o lori ho nia impulsu foun no ár renovasaun loloos, reforsa entusiazmu no konfiansa iha servisu hamutuk ne’ebé ita sei kontinua dezenvolve ba benefísiu edukasaun no dezenvolvimentu sustentavel ba ita-nia rai nian,” Ministra Dulce dehan ba jornalista sira.
Aleinde inaugura renovasaun ba eskritóriu diretora nian, saladeaula hitu ba alunu sira, inaugura mós instalasaun bee-matan ida ne’ebé nia ligasaun ba haris-fatin, ne’ebé finansia hosi Instituto Camões liuhosi Embaixada Portugál.
“Ida ne’e ho signifikadu boot, ne’ebé hatudu kompromisu husi nasaun rua, atu investe iha futuru ita-nia oan sira-nian no kualidade ita-nia eskola sira-nian,” Dulce subliña.
Tuir nia, kontribuisaun referida hatudu espíritu solidariedade no kompromisu atu hadi’a kondisaun eskola sira, no hanesan ezemplu inspiradór parseria nian entre setór públiku no setór privadu.
“Ita hatene katak infraestrutura eskolár ne’ebé di’ak mak fundamentál ba labarik sira-nia susesu, nune’e motiva estudante no profesór sira, estimula domin ba aprendizajen no kontribui ba ambiente ensinu no aprendizajen ida-ne’ebé saudavel no inspiradór liu,” Dulce afirma.
Ministra Dulce apela ba profesór no estudante sira atu tau-matan ba fasilidade sira iha eskola referida no karik iha buat balun estragu presiza hadi’a filafali.
Iha fatin hanesan, Embaixadór Portugál ba Timor-Leste, Duarte Bué Alves sente orgullu hodi inaugura projetu referidu no projetu ne’e nia dokumentu asina kle’ur ona ho embaixadora sesante.
“Ha’u kontente tebes atu inaugura projetu ida-ne’e ho Ministru Edukasaun nia prezensa, tanba setór edukasaun nu’udar setór ida-ne’ebé sai prioridade ba ami, no hanesan área ne’ebe Governu Timor-Leste no Governu Portugál identifika ona iha programa estratéjiku kooperasaun nian, hodi prezente iha munisípiu hotu-hotu,” Embaixadór ne’e afirma.
Tuir diplomata ne’e, bainhira eskola di’ak estudante sira bele halo sira-nia estudu iha prosesu aprendizajen ho seguru, hodi hatudu sira ba diresaun loos, fó kbiit ba sira, fó ba sira ferramenta atu hasoru iha futuru.
Diretora Eskola Ensinu Baziku Farol, Brigida Coelho, agradese ba Embaixada Portugál no Ministra Edukasaun, sira-nia apoiu no dedikasaun ba parseria ida-ne’e.
“Ha’u apresia ho parseria kolaborasaun hodi finaliza manutensaun klase nian ne’ebé ajusta ba prosesu selesaun nian. Ida-ne’e foin hahú faze ida no ami sujere atu ita-nia parseria kontinua ho projetu foun sira, tantu projetu infraestrutura no projetu ho natureza edukativa,” nia hateten.
Diretora ne’e hateten etapa referida sei permite atu akomoda tan estudante na’in-100, no hamenus estudante nakonu iha klase laran hodi hadi’a kualidade edukasaun ne’ebé di’ak.
“Ida-ne’e sei sai hanesan instrumentu ida iha área ne’e hodi oferese edukasaun ida-ne’ebé di’ak liután, la’ós de’it ba ema metan sira, maibé projetu ida-ne’e hanesan testamentu ida ba parseria entre ami nia eskola ho Embaixada Portugál iha Timor-Leste,” nia tenik.
Entretantu, obra referida hahú halo reabilitasaun iha fulan-Maiu no ramata iha Novembru tinan ne’e, ne’ebé apoiu orsametu husi Embaixada Portugál hamutuk rihun $135.
Jornalista: Osória Marques
Editór: Xisto Freitas da Piedade
