DILI, 10 Novembru 2025 (TATOLI)—Prezidente Bee Timor-Leste, Empreza Públika (BTL, E.P), Gustavo da Cruz, informa prosesu asesibilidade bee-moos ne’ebé komunidade sasesu husi kanalizasaun públiku ne’ebé Estadu estabelese iha territóriu nasionál foin atinje 49%.
Notísia Relevante: BTL sei promove melloramentu bee-moos iha kapitál postu administrativu
iha territóriu nasionál “Prosesu asesibilidade melloramentu bee moos ba komunidade sira iha territóriu nasionál seidauk to’o ninia meta, tanba Governu mós foin investe setór bee hahú husi munisípiu Lautein,” Prezidente BTL, E.P ne’e informa ba jornalista sira iha nia kna’ar fatin, Kaikoli, ohin.
Nune’e, nia dehan, sira sei iha ezersísiu lubuk ida para kapitál munisípiu sira hotu inklui kapitál Dili tenke halo investimentu modernu ho sistema filtrasaun bee nian, ho nune’e mak foin bele atinje meta.
Kona-ba asesibilidade kanalizasaun públika kobre ona 49%, nia hatutan, ne’e ba kanalizasaun públik maibé kona-ba kobertura ne’e atinje ona 90%-resin, tanba ema hotu-hotu bele hetan bee husi fonte ne’ebé de’it maibé atu hetan husi kanalizasauj públiku ne’ebé Estadu prepara ne’e foin atinje 49%.
“Tanba tuir Planu Estratéjia Dezenvolvimentu Nasionál (PEDN) 2011-2030 katak to’o 2030 ne’e komunidade tomak tenke asesu bee-moos tuir metasne’ebé iha, maibé bainhira laiha investimentu entaun ita labele ko’alia kona-ba meta,” nia dehan.
Hahú agora, tuir nia, Governu tau ona osan hodi investe liuhusi BTL, E.P, halo ninia dezenvolvimentu atu mellora iha kapitál no postu administrativu hotu, kontinua implementa ba nivél suku no aldeia sira hodi konklui meta ne’ebé define ona iha PEDN.
Jornalista : Alexandra da Costa
Editór : Cancio Ximenes
