DILI, 10 Novembru 2025 (TATOLI) – Ministériu Transporte no Komunikasaun (MTK) ezekuta, husi Janeiru to’o Outubru, Orsamentu Jerál Estadu (OJE) 2025 ho pursentu 59,8 husi totál alokasaun $13.535.528.
Diretór-Jerál Administrasaun no Finansa MTK, Aniceto Leto Soro, hateten alokasaun orsamentu ba saláriu no vensimentu hamutuk millaun $4.679, bens no serbisu $5.887.541, transferénsia públika $1.811.500, kapitál menór $677.862, no kapitál dezenvolvimentu $296.870.
“Husi orsamentu ne’e, atuál 7.983.881,78 (59,8%), obrigasaun $901.867,67 (6,79%), kompromisu $790.990,67 (5,92%). Ami sei iha osan balansu $3.676.788,11 (27,53%)”, Aniceto Leto Soro informa ba Tatoli iha nia knaar fatin, ohin.
Nia esplika katak husi ezekusaun orsamentu sira ne’e, saláriu no vensimentu mak ki’ik liu, tanba funsionáriu sira MTK pur volta 111 mak halo hela lisensa sein vensimentu no bá fali serbisu iha ajénsia sira ne’ebé tutela hela ba MTK.
Ezekusaun boot liu mak ba tranferénsia públika tanba tranfere ba ANATL hamutuk millaun $1.8, tuirmai mak bens no serbisu. Kapitál dezenvolvimentu nia ezekusaun mós daudaun sei ki’ik tanba orsamentu ne’e ba retensaun, ne’ebé serbisu ne’e depende ba fíziku hotu mak halo prosesu pagamentu.
“Ami-nia ezekusaun kada tinan la to’o 100%, tanba osan sira ne’ebé la uza tenke filafali ba kofre Estadu. Osan ba saláriu lei la fó dalan ita muda, entaun tenke filafali ba kofre, tanba ida-ne’e hanesan garantia ida bainhira funsionáriu sira filafali mai sei hetan, tanba sira ne’e permanente”, nia dehan.
Notísia relevante: MTK aloka rihun $185 hodi sosa blanku ba karta kondusaun no livrete
Jornalista: Arminda Fonseca
Editora: Maria Auxiliadora
