VIKEKE, 10 Novembru 2025 (TATOLI)—Akontesimentu sirkuitu eletrisidade iha Aldeia Mauselok, Suku Matahoi, Postu Administrativu Uatulari, Munisípiu Vikeke, rezulta na’in-rua (2) grave no na’in-ida (1) mate.
Xefe Aldeia Mauselok, Cetino Pinto António, haktuir akontesimentu ne’e akontese iha Domingu (09/11/2025) lorokraik maizumenus tuku 18:00 Otl, bainhira abitante sira hamoos bee-posu no hasai besi iha bee-laran mak besi kona fali fiu eletrisidade mak soke abitante na’in-tolu.
“Iha akontesimentu ne’e ami haree abitante ida ho naran Ernesto bainhira hetan soke iis laiha tiha kedas. Ho akontesimentu ne’e, komunidade bolu ambulánsia hodi lori sira bá sentru saúde, maibé to’o ne’ebá na’in ida lakonsege salva no família sira lori fila mate-isin bá matebian nian rezidénsia iha Aldeia Mauselok,” Cetino Pinto Antónia dehan ba TATAOLI liuhusi telefónika, Segunda ne’e.
Enkuantu, nia relata, abitante na’in-rua mak kontinua transporta ba ospitál internamentu Munisípiu Vikeke hodi halo tratamentu tanba ho kondisaun grave.
Iha fatin seluk, Koordenadór Eletrisidade Timor-Leste, Empreza Públika (EDTL, E.P.), Afonso Menezes Gomes, esplika enerjia eletrisidade forsa liu nune’e ema mak tenke evita besik fiu sira.
Jornalista: Vitorino Lopes da Costa
Editór: Xisto Freitas da Piedade
