Tinan ne’e, SMAPPF Vikeke kontinua espansa nuu 615 iha Postu Vikeke Vila
VIKEKE, 10 Novembru 2025 (TATOLI)—Diretór Servisu Ministériu Agrikultura, Peska, Pekuária no Floresta (SMAPPF) Munisípiu Vikeke, Olívio Soares Freitas informa iha tinan ne’e (2025) SMAPPF Vikeke liuhusi Diresaun Planta no Indústria halo espansaun nuu iha Postu Vikeke Vila hamutuk 615 ne’ebé daudaun ne’e moris ona.
“Kona-ba polítika revitalizasaun nuu, ita halo ona espansaun nuu kuaze tinan tolu ona. Iha 2025 ne’e ita-nia tékniku sira kuda tan 615, ne’ebé okupa rai ektare lima (5) iha Suku Uma-Ua’in Leten, Bahalaraua’in no Luka. Ami kontinua koordena ita-nia autoridade lokál sira hodi haree ita-nia produtu nuu, tanba ita Vikeke nia produtu mak nuu,” Olívio Soares Freitas dehan ba TATOLI iha ninia knaar fatin, Beloi, Vikeke, Segunda ne’e.
Olívio apela ba komunidade atu kesi no sulan animál atu labele han nuu ne’ebé kuda ona.
“Nuu sira-ne’ebé daudaun iha Munisípiu Vikeke ne’e kuda iha tempu portugés nian ne’ebé nuu maiória mak idade ona. Agora mak ita foin kuda filafali nuu,” nia haktuir.
Nia dehan, kona-ba fini ne’e, SMAPPF Vikeke daudaun laiha viveiru hodi prodús fini nuu, más nuu ne’ebé kuda hetan apoia husi MAPPF nasionál mak tékniku sira kuda iha Munisípiu Vikeke.
“Iha tinan hirak-ne’e ami laiha viveiru nuu, nune’e fini nuu sira-ne’e ami hetan husi nasionál mak ita-nia tékniku planta indústria kuda no halo kontrolu ba nuu sira-ne’ebé kuda ona,” nia relata.
Diretór Olívio hatutan, ba espansaun nuu iha Munisípiu Vikeke halo mós sensibilizasaun ba komunidade agríkola sira hodi kuda nuu hodi substitui nuu tuan sira.
Iha fatin ketak, Reprezentante Tékniku Planta Indústri Munisípiu Vikeke, Manuel da Cruz de Jesus, haktuir kona-ba espansaun nuu iha Munisípiu Vikeke hahú husi 2023-2025 ho totál nuu ne’ebé kuda ona hamutuk 4.920.
Jornalista: Vitorino Lopes da Costa
Editór: Xisto Freitas da Piedade
