VIKEKE, 11 Novembru 2025 (TATOLI)–Suspeitu ho inisiál L tama ona prizaun preventiva tanba taa vítima ho inisiál T to’o liman kotu.
Kazu ne’e akontese iha Aldeia Iramer, Suku Luka, Postu Vikeke Vila, iha 02 Novembru 2025.
“Iha loron finadu, 02 Novembru, ita rejista kazu agresaun fízika. Kazu agresaun fízika ne’e suspeitu taa vítima nia liman karuk kotu, nune’e PNTL detein suspeitu no loron 05 fulan-Novembru ami lori suspeitu bá Tribunál Baukau hodi halo primeiru interrogatóriu. Daudaun ne’e suspeitu tama ona prizaun preventiva iha Bekora, Dili,” Komandante Polísia Nasionál Timor-Leste (PNTL) Munisípiu Vikeke, Superintendente Polísia António do Rego Fernandes ba jornalista sira iha nia kna’ar fatin, Beskem, Vikeke, Tersa ne’e.
Tuir kronolojia, kazu ne’e akontese iha tuku 16:00 Otl, bainhira feto vítima ne’e fila husi Klalerek, Suku Bibileo. Kuandu to’o iha uma, iha diskusaun balun ho suspeitu to’o rezulta vítima nia liman karuk kotu.
Ho akontesimentu ne’e, médiku sira to’o kedas fatin hodi evakua vítima bá Ospitál Internamentu Munisípiu Vikeke atu halo tratamentu médiku.
Enkuantu, parte Polísia Munisípiu Vikeke foti obrigatóriu suspeitu L hodi halo identifikasaun no aprezenta ba Ministériu Públiku (MP) tanba asaun ne’e flagrante delitu.
Jornalista: Vitorino Lopes da Costa
Editór: Xisto Freitas da Piedade
