DILI, 11 Novembru 2025 (TATOLI)—Diretór Nasionál Ensinu Sekundáriu Jerál Ministériu Edukasaun (ME), Benjamin Fernandes hateten Diresaun Nasionál Ensinu Sekundáriu Jerál legaliza ona diploma hamutuk 9.404 iha fulan-Janeiru to’o Novembru tinan ne’e.
“To’o ohin loron ita-nia diresaun legaliza ona diploma ba estudante Ensinu Sekundáriu Jerál hamutuk 9.404. Hosi ne’e estudante barak liu presiza hodi konkorre vaga ba Polísia Nasionál Timor-Leste nian,” nia dehan ba TATOL iha nia knar fatin, Vila Verde, Dili, Tersa ne’e.
Nia hatutan legalizasaun ida-ne’e la’ós de’it iha Dili maibé munisípiu mós iha, tanba ne’e diresaun atende de’it tuir nesesidade estudante sira.
“Se estudante sira hetan bolsa estudu entaun diresaun ne’e simu estudante nia diploma ida mai ho urjentemente ne’e ami haruka hein no fó kedas, maibé se la urjénsia ne’e dadeer sira hatama hela lorokraik mak mai foti, se lae aban dadeer mak mai foti. Ita nunka husik prosesu kle’ur to’o loron rua ba leten,” nia hateten.
Dirijente ne’e hateten katak diresaun ne’e atende estudante nia dokumentu kada loron bele liu 50.
Jornalista: Osória Marques
Editór: Xisto Freitas da Piedade
