Ministériu Finansa superviziona ezekusaun orsamentál Ajénsia Tatoli,I.P
DILI, 11 Novembru 2025 (TATOLI) – Diresaun-Jerál Tezouru husi Ministériu Finansa halo monitorizasaun, ohin, kona-ba ezekusaun orsamentál Ajénsia Notisioza Timor-Leste, Institutu Públiku – Tatoli, I.P.
Xefe Ekipa Monitorizasaun, Lígia Nunes, hateten monitorizasaun ne’ebé Ministériu Finansa halo bazeia ba papél prinsipál ne’ebé hatuur iha Dekretu-Lei Númeru 43/2024 Dezembru kona-ba Ezekusaun Orsamentu Jerál Estadu, iha artigu 14 númeru 1 hateten Diresaun-Jerál Tezouru sei halo monitorizasaun kona-ba ezekusaun orsamentál ba serbisu no entidade sira husi setór administrasaun públika no Institutu Nasionál Seguransa Sosiál (INSS) hodi verifika no avalia konformidade tuir regra no prosedimentu sira relasiona ho reseita no despeza.
Ida-ne’e mós inklui saldu la ezekutadu husi pagamentu fundu maneiu, adiantamentu kaixa, merenda eskolár no seluk tan.
“Monitorizasaun ida-ne’e nia objetivu prinsipál mak hadi’a jestaun finansa públiku, identifika inkomprimentu ba regra prosedimentu no padraun jestaun finansa públika ne’ebé relasiona reseita no despreza, identifika difikuldade no lakuna ne’ebé serbisu entidade sira enfrenta, liuliu iha pagamentu kontabilidade no relatóriu”, Lígia Nunes dehan ba Tatoli, Faról.
Nia esplika katak supervizaun ba ezekusaun orsamentál Tatoli nian ne’e sei verifika no avalia konformidade tuir regra no prosedimentu sira relasiona ho reseita no despeza, inklui saldu husi pagamentu fundu maneiu, adiantamentu kaixa, kontabilidade no relatóriu ba períodu trimestre dahaat (Q4) tinan 2024, Q1, Q2 no Q3 2025.
“Rezultadu [monitorizasaun] ami sei relata iha ami-nia relatóriu no sei aprezenta ba Ministra Finansa, nomós ba entidade sira hotu, inklui mós ami-nia rekomendasaun sira”, nia dehan.
Tuir nia, bainhira sira finaliza supervizaun ne’e, karik iha lakuna ka difikuldade balu mak hetan sei hato’o iha relatóriu no sei fornese asisténsia téknika direta ba Tatoli atu hadi’a no mellora iha futuru.
Tatoli ezekuta, husi Janeiru to’o 10 Novembru 2025, Orsamentu Jerál Estadu hamutuk 76%, husi totál alokasaun $667.171, ne’ebé destina ba kategoria rua mak saláriu no vensimentu $533,159 (ezekuta ona $397.408 ka 75%), no bens no serbisu $133,896 (ezekuta ona $108,763 ka 81%).
Jornalista: Arminda Fonseca
Editora: Maria Auxiliadora
