DILI, 11 Novembru 2025 (TATOLI)—Ministériu Turizmu no Ambiente (MTA) liuhusi Diretór Jerál Turizmu, António da Silva, konsidera turizmu mariñu sai rekursu potensialidade iha Timor-Leste tanba eziste ho beleza tasi oioin bele atrai turista sira.
Notísia Relevante: Iha konferénsia SIDS, PM Xanana anunsia hakarak kria parke mariñu iha Ataúro
Diretór Jerál Turizmu, António da Silva, hateten ita mós iha turizmu komunitária maibé ne’e segmentu iha merkadu de’it, entaun modelu turizmu ne’ebé iha poténsia boot liu mak turizmu mariñu tanba TL nia tasi nakonu ho rikusoin oioin ne’ebé gosta atrai turista sira atu luku tasi.
“Ida-ne’e mak atividade kosteira tasi nian entaun ita-nia rikusoin mak ne’e, tanba ita-nia diversidade tasi mós úniku iha mundu liuliu iha Ataúru ne’e rasik. Tanba, iha estudu afirma katak diversidase tasi ho númeru ikan ne’é lahanesan barak ka modelu oioin,” Diretór Jerál nee relata ba Agência Tatoli iha ninia kna’ar fatin, ohin.
Aleinde ne’e, nia afirma poténsia sira seluk mak turizmu iha rai-maran nian hanesan haree husi várias kultura, istória, natureza ne’é tenke promove nafatin.
Nia dehan, kona-ba estratéjia marketing nian ne’e Timor-Leste iha meta modalidade tolu (3) mak hanesan turizmu mariñu, turizmu kulturál no turizmu rurál hanesan eko turizmu inklui turizmu komunitáriu.
“Tanba ita iha verdade produtu turizmu ne’ebé iha hanesan rikusoin sira iha tasi laran, iha foho no mós rekursu umanu rasik. Entaun, estratéjia saida mak ita sei halo hodi atrai turista sira mai vizita ita-nia fatin turizmu liuhusi kanál plataforma online sira hanesan mídia sosiál website, tiktok, facebook, instagram ne’ebé bele fasilita referénsia ba vizitante sira,” nia dehan.
Tanba, tuir Ministériu Turizmu no Ambiente nia polítika meta nian to’o 2030 tenke rejista vizitante sira-ne’ebé tama mai purvolta rihun-200, maibé impaktu husi situasaun COVID-19 entaun númeru vizitante ne’ebé tama mai Timor tun tiha.
Notísia Relevante: Dezenvolvimentu Sustentável Eko-Turizmu Mariñu, KM Analiza Aprezentasaun Whales
Jornalista : Alexandra da Costa
Editór : Cancio Ximenes
