DILI, 11 Novembru 2025 (TATOLI)—Federasaun Futeból Timor-Leste (FFTL) sei realiza kompetisaun ho naran Tasa Liga FFTL iha fulan-Dezembru tinan-ne’e.
Adjuntu Sekretáriu Jerál FFTL, Fernando Xavier esplika planu kompetisaun referida nu’udár parte kumpri kompromisu ne’ebé fó-sai husi Prezidente FFTL, Nilton Gusmão bainhira hala’o kongresu anuál iha fulan-Agustu liubá.
“FFTL rasik mak sei organiza kompetisaun iha tinan-ne’e no tasa referida sei finansia direta husi Prezidente FFTL,” Adjuntu Sekretáriu Jerál FFTL hateten liuhosi konferénsia imprensa iha Bairros dos Grilos, Tersa ne’e.
Nia relata kompetisaun referida sei partisipa husi klube futeból iha segunda no primeira divizaun Liga Futeból Timor-Leste ho totál klube 13 kompostu ualu (8) husi primeira divizaun no lima (5) husi segunda divizaun.
FFTL liuhosi Komisaun organizadora iha semana ne’e sei hato’o karta konvite ba klube partisipante sira atu partisipa reunaiun téknika hodi ko’alia kona-ba regulamentu jogu antes hahú kompetisaun iha fulan-Dezembru.
Iha fatin hanesan, Diretór Kompetisaun FFTL, João Campos esplika objetivu husi kompetisaun ne’e atu evalua atividade klube sira durante tinan ida-ne’e liuliu ligadu ho jogadór sira tanba hafoin Liga Futeból Timor-Leste ramata atividade jogu paradu totál nune’e presiza iha kompetisaun nune’e bele ajuda hasa’e kualidade jogadór sira iha Timor-Leste.
“Kona-ba totál orsamentu ba realizasaun kompetisaun ita sei anúnsia iha reuniaun téknika ho klube sira,” João Campos hateten.
Komisaun organizadora husu ba klube 13 atu prepara aan liuliu halo rejistrasaun no partisipa másima iha reuniaun téknika hodi esklaresidu kona-ba sistema no regulamentu jogu antes realiza drawing inklui abertura ba kompetisaun Tasa Liga FFTL.
Entretantu, klube 13 ne’ebé sei partisipa iha kompetisaun Tasa Liga FFTL kompostu husi Karketu Dili FC, Emanuel FC, Coração FC, AD SLB, Porto Taibessi, Assalam FC, DIT FC, As Marca, Aitana FC, Nagardjo, Aitana, FIEL, Santa Cruz no Lika-Lika FC.
Prepara orsamentu rihun $35 ba klube vensedór
Komisaun Organizadora iha planu sei prepara prémiu hamutuk rihun $35 ba klube ne’ebé sai kampiaun (vensedór) ba Tasa Liga FFTL 2025.
Diretór Kompetisaun Eventu FFTL, João Campos esplika orsamentu ne’e parte FFTL hetan apoia husi kompañia Esperansa Timoroan (ETO) Group iha-ne’ebé sei aplika meiu kompetisaun durante fulan-ida.
Campos relata, komisaun mós sei prepara bonus ba klube iha kada jogu ho sistema meiu kompetisaun ne’ebé klube sei koloka ba grupu hamutuk haat iha-ne’ebé sei deside liuhusi reuniaun téknika no dada númeru sorteiu antes abertura jogu.
Komisaun organizadora mós planeia katak hafoin ramata preparasaun téknika, kompetisaun referida sei hala’o kada semana ho durasan loron haat hanesan husi Kinta to’o Domingu.
Jornalista: Natalino Belo
Editór: Xisto Freitas da Piedade
