Selebra Masakre Santa Krús 1991, TLC realiza Feira Juventude Empreendedorizmu iha Uatulari
VIKEKE, 11 Novembru 2025 (TATOLI)–Selebra Masakre Santa Krús 1991 ba da-34, Leonel Training Center (TLC) hamutuk ho Klibur Juventude Lari, realiza Feira Juventude Empreendedorizmu ba grupu produtór sira iha Aldeia Lari, Suku Afaloikai, Postu Administrativu Uatulari, Munisípiu Vikeke.
Objetivu husi atividade ne’e atu halibur joven sira iha Postu Uatulari hodi hamenus problema no aumezmu tempu hanesan reflesaun ba masakre ne’e.
“Ohin ita realiza feira ida-ne’e hodi vendedór sira fa’an sira-nia produtu lokál iha ámbitu komemorasaun loron importante 12 Novembru ne’ebé hanesan loron ba ita-nia juventude asua’in sira-nia luta ba independénsia. Liuhusi atividade sira-ne’e atu ita labele haluha eroi sira-nia luta ba rai doben Timor-Leste,” Jestór TLC, Natalino Soares Sarmento hateten iha abertura feira, Tersa ne’e.
Natalino hatutan, liuhusi juventude rezisténsia sira-nia luta, ohin loron juventude kontente ka haksolok iha faze ukun rasik aan.
Iha fatin hanesan, Reprezentante Komandante Polísia Nasionál Timor-Leste (PNTL) Munisípiu Vikeke, atuál Komadante Eskuadra Uatulari, Francisco Fernandes Menezes apresia juventude Lari ne’ebé ho inisiativa no sakrifísiu rasik hodi realiza feira ba komemorasaun referida.
“Ha’u husu joven sira nafatin kuda metin unidade nasionál, patriotizmu no nasionalizmu,” nia apela.
Aleinde ne’e, Xefe Suku Afalokai, Cesário N. Pires sente orgullu ba juventude Aldeia Lari ne’ebé reliza eventu ne’e ne’ebé konsideradu hanesan ezemplu ba aldeia sira iha Suku Afaloikai.
“Liuhusi negósiu sira-ne’ebé ohin ita-nia inan-feton sira fa’an ne’e iha signifikativu tanba bele ajuda ekonómia família uma laran nian. Nune’e, ha’u apela ba joven sira iha Suku Afaloikai banati tuir joven rezisténsia sira liuliu ba juventude Masakre 12 Novembru,” nia akresenta.
Iha biban ne’e mós vendedór Suku Afaloikai, Augusta da Silva sente kontente no agradese ba joven sira husi Aldeia Lari ne’ebé realiza feira hodi vendedór sira fa’an sira-nia produtu lokál.
“Ha’u sente kontente partisipa iha feira no feira ne’e ha’u fa’an produtu lokál sira hanesan talas, batar, ai-farina no seluk tan,” nia haktuir.
Enkuantu, Feira Juventude Empreendedorizmu aprezenta produtu lokál husi grupu inan-aman sira mak hanesan hakmerik, batar da’an, ai-farina kukus, batar sona no produtu lokál sira seluk.
Stand iha feira ne’e hamutuk 26 no vendedór hamutuk 26.
Partisipa iha feira referida kompostu husi autoridade lokál Postu Uatulari, veteranu, juventude, estudante LTC no komunidade Suku Afaloikai.
Jornalista: Vitorino Lopes da Costa
Editór: Xisto Freitas da Piedade
