DILI, 11 Novembru 2025 (TATOLI)—Selesaun Nasionál Futeból Timor-Leste hahú halo preparasaun antes partisipa jogu Kualifikasaun Asian Football Confederation (AFC) Asian Cup U-17 ne’ebé sei realiza fulan-ne’e iha Xina.
Ekipa selesaun nasionál U-17 hahú treinu iha loron 29 Outubru ne’ebé lidera husi treinadór Manuel Alari da Costa Soares ne’ebé tuir kalendáriu kompetisaun referida sei realiza iha loron-22-30 Novembru.
“Ekipa selesaun nasionál U-17 hahú treinu preparasaun ba partisipa jogu Kualifikasaun AFC Asian Cup 2027,” komunikadu imprensa ne’ebé TATOLI asesu husi Federasaun Futeból Timor-Leste (FFTL) hateten iha Tersa ne’e.
Ekipa Selesaun Nasionál Timor-Leste U-17 hala’o treinu ba preparasaun iha Kampu Demokrasia Dili iha-ne’ebé Timor-Leste koloka iha grupu A hamutuk ho uma-na’in Xina, Banladés, Bahrain, Brunei Darussalam no Srilanka.
Tuir formatu kompetisaun, kualifikasaun referida sei reprezenta ekipa ida-ne’ebé sai kampiaun iha tabela klasifikasaun iha-ne’ebé sei koloka hamutuk ho nasaun sia (9) seluk ne’ebé hakat automatikamente ba faze ikus.
Entretantu, nasaun sia ne’ebé iha ona tikete mak hanesan Arábia Saudita, Qatar, Uzbekistaun, Koreia Súl, Korea Norte, Japaun, Tazaskistaun, Indonézia no Uniaun Emiradu Arábia.
Jornalista: Natalino Belo
Editór: Xisto Freitas da Piedade
