LIKISÁ, 12 Novembru 2025 (TATOLI)—Komunidade Suku Ulmera, Postu Administrativu Bazartete, Munisípiu Likisá, kuarta ne’e, komemora anversáriu masakre Santa Kruz ba da-34 (12 Novembru1991—12 Novembru 2025) ho misa agradesementu.
Notísia Relevante:
Padre selebrante, Pe. Joaquim Sarmento SJ, hateten komemora loron importante ne’e hodi fó onra ba eroi juventude loriku asswa’in sira-ne’ebé fó ona sira-nia vida ba rai ida-ne’e iha tinan 34 ba kotuk.
Komemorasaun ne’e, tuir nia, meiu ida hodi hakruuk ba eroi hotu ne’ebé luta hodi defende soberania Timor-Leste nian no fanu mundu nia atensaun ba luta libertasaun nasaun ne’e nian.
“Ita komemora Masakre 12 Novembru tinan ida-ne’e nakonu ho entuziasmu, nakonu ho domin hodi hatudu ita-nia respeitu ba eroi sira,” Pe. Joaquim hateten iha nia omilia bainhira selebra misa afradesementu iha Kapela Nossa Seiñora Estrela do Mar, Ulmera, kuarta ne’e.
Xefe Suku Ulmera, Postu Administrativu Bazartete, Martinho Correia, hateten komemora loron masakre Santa Kruz 12 de Novembru hodi fó onra ba eroi sira-ne’ebé fó sira-nia vida hodi sosa Timor-Leste nia independénsia.
Luta ne’ebé juventude sira iha tempu ne’ebá halo fó hanoin mai juventude ohin loron, atu banati tuir tanba eroi sira luta ona ba libertasaun patria, juventude ohin loron tenke luta hodi kontribui ba nasaun nia dezenvolvimentu.
“Ita agradese tebes ba eroi sira-nia luta iha tinan 34 ba kotuk. Sira-nia luta mak ohin ita bele goza ona independensia ida-ne’e,” Martinho hateten.
Reprejentante juventude Suku Ulmera, Lisandro Fernandes Soares, hateten loron 12 de Novembru importante tebes hodi hanoin hikas eroi sira-ne’ebé mate iha semitériu Santa Kruz hodi sosa Timor-Leste nia ukun rasik aan.
Tuir Lisando, eroi Masakre Santa Kruz nia mate mak fanu mundu nia matan hodi haree Timor-Leste iha situasaun ne’ebé grave no hetan violasaun direitu umanu husi Estadu Indonézia ka rezime Suharto nia ukun.
“Hanesan jerasaun foun, mai ita hakruuk fó onra ba ita-nia eroi sira ne’ebé mate iha tempu ne’ebá. Sira-nia mate mak fanu mundu nia matan hodi haree ba kestaun Timor-Leste nian iha tempu ne’ebá,” nia dehan.
Bainhira ramata misa iha kapela Nossa Señora Estrela do Mar Lanu-Mane Suku Ulmera, komunidade akompañadu husi Pe. Joaquim hamutuk ho Xefe Suku la’o ain kuaze metru 70, lori ai-funan ba kari iha Kruz Boot ne’ebé lokaliza iha foho leten Ulmera.
Jornalista : Hortencio Sanchez
Editór : Cancio Ximenes
