Autoridade Kovalima aloka osan rihun $10-resin komemora 28 Novembru
KOVALIMA, 13 Novembru 2025 (TATOLI)-Autoridade Munisípiu Kovalima daudaun ne’e, aloka ona orsamentu hamutuk $10.500 hodi halo preparasaun ba komemorasaun loron proklamasaun independénsia unilaterál Timor-Leste ba dala-50 (1975-2025).
“Ami forma ona komisaun organizadora ho nia sesaun 17 atu komemora loron independénsia Timor-Leste 28 Novembru hodi halo preparasaun ho nia orsamentu $ 10.500,” dehan, Prezidente Komisaun Organizadora, Alberto Moniz de Araújo, ba jornalista iha salaun AMC ohin.
Hosi montante orsamentu ne’e sei aloka ba postu administrativu Zumalai ho valór $ 1.500, Fatululik $1000, Fatumea $1000, Fohorem $1000, Tilomar $1000, Maukatar $1000 tanba sira sei komemora iha ida-idak nia postu administrativu, enkuantu, postu administrativu Suai sei komemora hamutuk ho autoridade munisípiu Kovalima iha Kampu Ladi.
Nia hateten Komisaun Organizadora daudaun ne’e prepara ona planu no programa balun atu komemora loron istóriku ne’e hanesan atividade sae bua, misa agradesimentu, sunu lilin no kari ai-funan iha monumentu setembru negro 1999 Kovalima.
Tuir nia maske iha ona planu no programa balun iha ona, maibé komisaun organizadora ho kada sesaun sira sei kontinua halo enkontru iha tempu tuirmai hodi reajusta orsamentu no programa no atividade sira nune’ebele komemora loron proklamasaun independénsia unilaterál Timor-Leste ba tinan ida ne’e ho di’ak.
Jornalista: Celestina Teles
Editór : Florencio Miranda Ximenes
