VIKEKE, 13 Novembru 2025 (TATOLI)—Komandante Polísia Nasionál Timor-Leste (PNTL) Munisípiu Vikeke, Antonio Rego Fernandes relata hahú husi fulan-Janeiru to’o Outubru 2025, PNTL liuhusi Unidade Tránzitu rekolla taxa rodoviária husi infrasaun sira hamutuk $17.376,00 ba kofre Estadu.
“Kona-ba reseita ne’ebé ami rekolla to’o iha trimestre dahaat ne’e $17.376. Ida-ne’e mak ita hatama ba kofre Estadu. Reseita sira-ne’e ami rekolla husi auto stop sira-ne’ebé Unidade Tránzitu sira implementa iha Munisípiu Vikeke,” António ba TATOLI iha ninia kna’ar fatin, Beskem, Vikeke, Kinta ne’e.
Komandante PNTL Munisípiu Vikeke haktuir atividade auto stop ne’e sira koloka mós Polísia Tránzitu ba kada eskuadra iha postu, maibé dezafiu ne’ebé enfrentadu mak laiha transporte no hasoru dezafiu mós ba kombustivel ba membru sira hodi uza ba servisu.
“Dezafiu sira-ne’e ami relata hotu ona ba komandu, maibé to’o ohin loron seidauk hetan solusaun,” nia tenik.
Husi reseita ne’ebé rekollida, Janeiru hamutuk $1.404,00, Fevereiru $1.082,00, Marsu $3.365,00, Abríl $1.217,00, Maiu $386,00, Juñu $1.649,00, Jullu $2.277,00, Agustu $1.193, Setembru $2.055 no Outubru $2.748.00. Totál infrasaun hamutuk 779 no totál infrasaun Kódigu Estrada hamutuk 805.
Jornalista: Vitorino Lopes da Costa
Editór: Xisto Freitas da Piedade
