OEKUSI, 14 Novembru 2025 (TATOLI) –Asosiasaun Halibur Defisiénsia Matan Timor-Leste (AHDMTL), inskreve ona Ema ho Defisiénsia (EhD) matan na’in-10 atu bele asesu ensinu superiór iha anu letivu 2026.
“Ita rejista ona nu’udar alumni husi formasaun AHDMTL ba brailler, agora atu asesu ba ensinu superiór iha universidade rai-laran, maibé ami sei identifika hela tanba balun seidauk rejista, tanba na’in-10 ne’e, tuir ona ezame nasionál iha tinan kotuk, no balun foin daudaun ne’e,” Diretór Ezekutivu AHDMTL, Gabriel Ponciano de Souza dehan, iha Oekusi, ohin.
Nia informa, na’in-10 ne’e, nu’udar membru husi AHDMTL, tanba antes ne’e aprende ona brailler no teknolojia dijitalizasaun, depois asosiasaun apoia ho koordenasaun ba Ministériu Edukasaun hodi asesu edukasaun formál, balun asesu ensinu rekorrente, liu-liu sira-ne’ebé seidauk akaba ensinu pré-sekundária no sekundária.
“Ita haree no avalia sira iha ona koñesimentu, entaun ita rekomenda hodi kontinua ba universidade. Sira na’in-10 ne’e maioria defisiénsia matan,” nia hateten.
Nia relata, tuir dadus ne’ebé AHDMTL rejista iha territóriu nasionál provizóriamente 1000-resin rejista komesa husi 2011 to’o 2025, maibé dadus ne’e seidauk serteza tanba sei iha faze identifikasaun liu-liu área rurál sira.
Notísia relevante:AHDMTL hakarak kria sentru formasaun ba ema ho defisiénsia matan iha Oekusi
Jornalista: Abílio Elo Nini
Editór: Rafael Ximenes de A. Belo
