VIKEKE, 14 Novembru 2025 (TATOLI)—Autoridade Munisípiu Vikeke hamutuk ho Sekretaria Estadu Igualdade (SEI), Sesta ne’e, selebra Loron Nasionál Feto ba da-49 (1976-2025) iha Suku Maluru, Postu Vikeke Vila, Sesta ne’e.
Pontu vogál SEI Munisípiu Vikeke, Salvador Ximenes esplika katak objetivu husi selebrasaun Loron Nasionál Feto atu halo advokasia no hamoris espíritu luta ba dignidade feto ninian atu feto hotu hetan oportunidade no iguál iha sosiedade.
“Ami hakarak hato’o parabéns ba feto Timor-Leste liuliu ba ita-nia inan feton sira iha Munisípiu Vikeke. Ba selebrasaun loron feto ba da-49 iha Timor-Leste, tempu ona feto tenke brani, tempu ona feto tenke forte, tempu ona feto tenke hamriik iha oin no tempu ona feto lidera,” Salvador Ximenes hateten iha ámbitu komemorasaun ne’e.
Salvador enkoraja katak feto tenke luta hasoru violénsia oioin, feto tenke hamriik hateten lae ba violénsia, tempu ona feto tenke hetan oportunidade no feto tenke moris iha igualdade.
Iha fatin hanesan, Prezidente Asosiasaun Feto Munisípiu Vikeke, Luciana Guterres hateten Loron Nasionál Feto ne’ebé monu iha 03 Novembru, sai hanesan loron nasionál ba feto timoroan sira.
“Ita hamutuk hodi fó onra no gloria ba ita-nia feto maluk sira-ne’ebé fó sira-nia vida ba ukun rasik aan. Selebrasaun Loron Nasionál Feto ne’e atu fó rekoñesimentu ba ita feto nia luta hamutuk ho mane sira, atu hetan ukun rasik aan. Selebrasaun ida-ne’e importante tebes ba ita feto. Fó hanoin mai ita katak loron- 03 Novembru 1976 Saudoza Maria Tapó, feto primeiru ne’ebé brani fó aan ba mate ba rai ida-ne’e,” nia subliña.
Iha fatin hanesan, Sekretáriu Asuntu Apoiu Sosiedade no Organizasaun Munisípiu Vikeke, Acacio de Sousa, solisita feto Munisípiu Vikeke labele lakon esperansa ba dezenvolvimentu iha Munisípiu Vikeke no asosiasun nafatin halo koordenasaun atu feto bele partisipa ba atividade sira iha Munisípiu Vikeke.
“Feto iha direitu hodi kompete ba xefe suku, xefe aldeia sira no kualker pozisaun sira-ne’ebé iha Munisípiu Vikeke,” nia tenik.
Partisipa iha komemorasaun Loron Nasionál Feto ne’e husi feto potensiál sira iha Munisípiu Vikeke, autoridade lokál, Unidade Polísia Vulneravel (VPU-sigla ingleza) Vikeke, veteranu, profesór no estudante sira iha Suku Maluru.
Jornalista: Vitorino Lopes da Costa
Editór: Xisto Freitas da Piedade
