DILI, 14 Novembru 2025 (TATOLI)–Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’, Sesta ne’e, halo abertura ba serimónia Palestra husi Seksaun Jéneru ba Kursu Formasaun Kapitaun sira.
Iha biban ne’e, Jenerál Falur destaka pontu lima hodi mellora no dezenvolve institusaun FALINTIL-Forsa Defeza Timor-Leste (F-FDTL) sai profisionál liután iha futuru.
“Nu’udar Xefe Estadu-Maiór Jenerál, ha’u apela ba lideransa, hahú husi Komandante Komponente no Unidade sira no Xefe Divizaun sira hotu atu foti medida estratéjiku lima tuir mai, ida integrasaun kompleta rua modernizasaun institusionál, tolu rekrutamentu bazeia ba méritu, haat formasaun profisionál no ikus responsabilidade ka prestasaun konta,” Tenente Jenerál Falur hateten durante serimónia palestra iha Kuartel Jerál F-FDTL, Fatuhada.
Notísia relevante : F-FDTL no PNTL sei halo operasaun konjunta hodi garante seguransa iha territóriu nasionál
Integrasaun kompleta ne’e haree liu ba espesialidade militár hotu nakloke ba feto bazeia ba méritu no programa mentorizasaun ba ofisiál feto sira.
Aleinde ne’e, modernizasaun institusionál ne’e liga ba reforma ba instalasaun militár sira, alojamentu inkluzivu no implementasaun kódigu konduta ne’ebé metin hasoru asédiu no diskriminasaun.
Falur dehan, atu dezenvolve no mellora di’ak institusaun F-FDTL sai forsa ne’ebé profisionál maka presiza rekrutamentu bazeia ba méritu hodi halakon barreira sira ne’ebé la nesesáriu, esklui feto iha avaliasaun fíziku sira ne’ebé reflete ezijénsia operasionál lejítimu sira, la’ós estereótipu.
Formasaun profisionál sai mós pontu importante ba dezenvolvimentu institusionál, liuliu oinsá atu profisionaliza militár sira integrasaun edukasaun jéneru iha kursu lideransa. Treinamentu ba ofisiál sira atu lidera ekipa sira ne’ebé eterojéneu.
Tuir Jenerál Falur, responsabilidade ka prestasaun importante ba melloramentu iha instituisaun F-FDTL tanba métrika progresu ne’ebé klaru atu relata tinan-tinan. Komandante sira-nia avaliasaun liga ba lideransa inkluzivu.
“Iha tinan-lima oin mai, ita sei harii F-FDTL ida-ne’ebé diferente la’ós tanba ita abandona valór fundamentál sira hanesan korajen no disipliña, maibé tanba ita rekoñese katak valór sira-ne’e serbí di’ak liu bainhira nasaun tomak bele kontribui,” nia tenik.
Tenente Jenerál Falur katak, F-FDTL sei sai vanguarda ba igualdade jéneru, la’ós tanba impozisaun esterna maibé tanba irekoñese katak igualdade jéneru labele haketak husi instituisaun militár modernu, profisionalizadu no dignu ba Timor-Leste.
Jornalista : Natalino Costa
Editora : Julia Chatarina
