Malázia apoiu $2.000 ba “Dapur ba Povu” iha RAEOA
DILI, 14 Novembru 2025 (TATOLI)–Governu Malázia liuhusi nia embaixada iha Timor-Leste fó apoiu $2.000 hodi sosa ekipaemntu hanesan kadeira, livru no aihan hodi apoiu “Dapur ba Povu” ne’ebé harii husi Prezidente Repúblika, José Ramos-Horta iha Rejiaun Administrativa Oekusi Ambenu (RAEOA).
“Ita apoiu materiál ba labarik sira iha Oekusi, kantina ne’ebé Prezidente Repúblika rasik mak harii hodi halibur labarik sira iha ne’ebá. Sasán sira-ne’e hanesan kadeira, livru no aihan no sasán sira-ne’e konta ho osan hamutuk $2.000,” Embaixadór Malázia mai Timor-Leste, Dato Amarjit Sarjit Singh, hateten ba jornalista sira iha Palásiu Prezidensiál Nicolau Lobato, Bairru Pite, sesta ne’e.
Nia dehan, apoiu ne’e povu Malázia mak hakarak apoiu ho fuan no laran ba povu Timor-Leste hodi hametin relasaun di’ak entre nasaun rua ne’e.
“Ida-ne’e mak apoiu husi komunidade Malázia iha Timor-Leste ba inisiativa Prezidente Ramos-Horta nian hodi tau matan no prezerva bem-estar ba labarik ki’ik sira iha parte nutrisaun no aprendizajen. Nune’e, ohin, ha’u sente onradu bele hamutuk ho labarik sira iha Kantina Matak,” nia hateten.
Ajuda ne’e, meiu ida hodi apoiu Xefe Estadu Ramos-Horta nia atividade ne’ebé hakarak kombate mánutrisaun iha Timor-Leste liuliu fó aihan nutritivu ba labarik kiik sira iha nasionál no munisípiu.
Kantina matak ne’ebé lokaliza iha Dili iha Palásiu Prezidensiál no kantina seluk lokaliza iha Hera no RAEOA ne’ebé ho naran koñesidu “Dapur ba Povu”.
Jornalista : Hortencio Sanchez
Editór : Cancio Ximenes
